Dana Uayt Xoakin Baklining qo'l berishdan bosh tortgani haqida: "Uni haydashni aytdim"

Bakli ko'rgazmali vazn o'lchash marosimida Uaytga qo'l berishdan namoyishkorona bosh tortgan edi. 

Uaytning so'zlariga ko'ra, u nima bo'lganini bilmaydi va bunga unchalik ahamiyat bermayapti.

"Tushuncham yo'q. Bilasizmi, bu yigitlarning barchasi jang haftaligini turlicha o'tkazadi va vazn o'lchashga yaqin qolganda deyarli hammasi asabiy bo'lib qoladi. Ular vazn tashlaydi, mashq qiladi, mayda jarohatlar bezovta qiladi, oilasi va yaqinlaridan uzoqda bo'ladi, odatiy ovqat, suv va boshqa ko'plab narsalardan mahrum bo'lishadi.

Men bu biznesda shunchalik uzoq vaqtdan beri bormanki, bunday narsalarni shaxsiy haqorat deb qabul qilmaslik kerakligini tushunaman. Ilgari turnir kuni barchaga omad tilash uchun kiyinish xonalariga kirardim. Ammo endi hech kimga xalaqit bermaslikni maqul ko'raman. Jang haftaligini qanday o'tkazishingiz – bu sizning shaxsiy ishingiz. Va bu menga to'liq mos keladi", – dedi liga prezidenti tadbirdan keyingi matbuot anjumanida.

SHundan so'ng Uaytdan jangchining xatti-harakati uni chindan ham xafa qilmaganmi, deb so'rashdi.

"U mag'lub bo'lishi bilanoq, Xanterga uni Ligadan haydashni aytdim", – deb javob berdi UFC rahbari, yuzida hech qanday his-tuyg'u bildirmay.

Bu javob savol bergan jurnalistni dovdiratib qo'ydi va u tashkilot rahbaridan hazillashyaptimi yoki yo'q, aniqlik kiritishni so'radi.

"Albatta, hazillashyapman!", – deb kulib yubordi Uayt.

Eslatib o'tamiz, kechagi turnirning asosiy jangida Xoakin Bakli og'ir mag'lubiyatga uchradi va ikkinchi raund o'rtalarida kanadalik Mayk Melott tomonidan nokaut qilindi.