Devis Kubogining muhim bahsida o'ynamagan Istomin bugun Piterda kortga chiqadi

Ushbu musobaqada mamlakatimizning birinchi raketkasi Denis Istomin ham ishtirok etadi. Bugun hamyurtimiz juftlik musobaqasi bilan Piter turniridagi ishtirokini boshlab oladi. Taqvimda uning yakkalikdagi bahsi ham o'rin olgan. 

Istomin rossiyalik Mixail Elgin bilan juftlik hosil qilgan va ular bugun Toshkent vaqti bilan soat 17:00da mezbon tennischilar - Taymuraz Gabashvili va Evgeniy Karlovskiy hamkorligiga qarshi kortga chiqishadi.

Denis reja bo'yicha ertaga yakkalikning ilk bosqichida qozog'istonlik Mixail Kukushkin bilan to'qnash kelishi kerak. Bu vaziyatda biroz shubhali holat yuzaga kelmoqda. Osiyo o'yinlari g'olibi Devis Kubogining jahon ligasiga yo'llanma beruvchi uchrashuvida bizga nomalum sabablarga ko'ra kortga chiqmagan edi. 

Agar bunga jarohat sabab bo'lgan deb hisoblasak, demak, u ikki kunda tuzaladigan jarohat ekanda! Juda ham qiziq va shubhali holat. O'zbekiston tennis federaciyasi vaziyatga oydinlik kiritib, nima uchun Denis muhim bahsda kortga chiqmadi, degan savolga javob berganida edi, bu kabi shubha-gumonlarga hojat qolmasdi, nazarimizda. 

Eslatib o'tamiz, Buyuk Britaniyaga qarshi Glazgo shahrida kechgan bahsning to'rtinchi uchrashuvida Istominning o'rnini egallagan Sanjar Fayziev raqibiga deyarli qarshilik ko'rsata olmagan edi - 2:6, 2:6, 0:6. Buning natijasida terma jamoamiz 1:3 hisobida mag'lubiyatga uchrab, jahon ligasiga chiqish imkoniyatidan mahrum bo'lgan edi.