Do'stimni xotirlab

Oddiy, kamsuqum bu yigit sport jonkuyari edi. Men sportchi bo'lmasamda, kasbim taqozosi bilan sportga oshno edim. Bu xislatlar bizni yaqinlashtirgan bo'lsa, ajab emas. U yaxshigina chavandoz edi. Moskvada o'tkazilgan ot poygasida Jahon chempioni bo'lgan. Ammo bu haqda ko'pam gapiravermasdi. 

Ot sporti, uloq-ko'pkari haqida gap ketganda uni to'xtatish qiyin bo'lardi. U jo'shib ketardi. Otlar haqida soatlab gapirardi. Uning bu sohada etakchi mutaxassis ekanligiga tan bermaslikning iloji yo'q edi.

Ot sporti federaciyasida, uloq-ko'pkari federaciyasida uzoq yillar turli lavozimlarda mehnat qilgan bu tirishqoq inson 60 yoshga etar etmas bandalikni bajo qildi. Farg'onaning Beshariq tumanida tug'ilib, voyaga etgan Jo'raqo'zi Turdimatovning orzulari bisyor edi. Ot sporti, uni rivojlantirish bo'yicha takliflari, rejalari ko'p edi. Sportning bu turidan ham vakillarimiz olimpiya o'yinlarida ishtirok etishini jon-jon deb istardi. Afsus, HAYOT beshavqat ekan. U endi oramizda yo'q. 2018 yil 9 sentyabrda jon taslim etdi. Uning ortida oilasi, farzandlari o'nlab shogirdlari qoldi. Xotira va qadrlash kuni keng nishonlanayotgan ushbu kunlarda marhum do'stimiz Jo'raqo'zi Turdimatovni ozgina bo'lsada, xotirladik. Uning ruhi shod, oxirati obod bo'lishini Ollohdan so'rab qolamiz.

Ushbu fotolar uning faoliyatidan ozgina bo'lsada, tasavvur beradi, degan umiddamiz.

Fotolar muallifi  Alimurod MAMADAMINOV.