Dubov - rapidda jahon chempioni, shaxmatchilarimiz TOP-50ga kira olishmadi

Erkaklar o'rtasidagi bahslarda uch nafar istedodli yosh shaxmatchilarimiz ham ishtirok etishdi. Umumiy mukofot jamg'armasi 1 150 000 AQSH dollarini tashkil qiluvchi jahon chempionatining rapid yo'nalishida kecha bir nechta tur uchrashuvlari o'tkazilib, musobaqaga yakun yasaldi. 

Hamyurtlarimizdan eng yaxshi natijaga amaldagi jahon chempioni norvegiyalik Magnus Karlsenni mag'lubiyatga uchratgan xalqaro master SHamsiddin Vohidov erishdi. Yosh shaxmatchimiz 15 imkoniyatdan 8,5 ochko jamg'arib, 53-58 o'rinlarni band etdi. U jahon chempionatida reytingda o'zidan yuqorida turgan xalqaro grossmeysterlarni mag'lub etishning uddasidan chiqdi. SHamsiddinov so'nggi 15-partiyada rossiyalik Mixail Demidovni mag'lub etdi. 

Yosh grossmeysterimiz Nodirbek Abdusattorov 15 imkoniyatdan 8 ochko jamg'ardi. U qo'shimcha koeficentlarga ko'ra 69-83 pog'onalar orasida joylashdi. Jahonning eng yosh to'rtinchi xalqaro grossmeysteri bo'lib turgan Nodirbek so'nggi turda qora donalarda o'ynashiga qaramay, ispaniyalik mashhur xalqaro grossmeyster Francisko Valexo bilan murosaga keldi. 

Yana bir hamyurtimiz Nodirbek Yoqubboev esa 7,5 ochko bilan 93-96 pog'onalar orasidan joy oldi. Yoqubboev so'nggi 15-partiyada armanistonlik xalqaro grossmeyster Aram Xakobyan bilan durangga imzo chekdi. 

Rapid bo'yicha jahon chempionati kutilmagan natija bilan yakunlandi. Yakunda 15 imkoniyatdan 11 ochko jamg'argan rossiyalik grossmeyster Danil Dubov jahon chempioniga aylandi. U so'nggi turda ozarbayjonlik SHaxriyar Mamadiyarov bilan durang o'ynadi. Oq donalarda harakat qilgan Mamadiyarov g'alaba qozonganida, aynan u jahon chempioni bo'lar edi. 

CHempiondan yarim ochko kam jamg'argan SHaxriyar qo'shimcha ko'rsatkichlarga ko'ra ikkinchi o'rinni egalladi. Amerikalik Xikaru Nakamura esa kuchli uchlikka yakun yasadi. Vladislav Artemev (Rossiya) va Magnus Karlsen (Norvegiya) ham kuchli uchlikdagi grossmeysterlar singari 10,5tadan ochko to'plashdi.