Ekaterinburg “Katta Dubulg'a”. Mezbonlar birinchi bo'lishdi!

Sovrin jamg'armasi 154 000 AQSH dollarini tashkil qilgan musobaqada sayyoramizning 5ta qitasi 48 davlatidan jami 403 nafar (233 erkak, 170 ayol) dzyudochi ishtirok etdi. Mamlakatimiz sharafini esa 12 nafar hamyurtimiz himoya qildi. 

Musobaqa medallari hamda Tokio Olimpiadasiga muhim reyting ochkolari o'ynalgan turnirda Rossiya terma jamoasi norasmiy umumjamoa hisobida birinchi o'rinni egalladi. Mezbonlar 3ta oltin, 2ta kumush, 4ta bronza medalini qo'lga kiritishdi. Ular hisobida yana 5ta oltinchi, 7ta ettinchi o'rin ham bor. 

Ikkita oltin, bitta kumush, ikkita bronza medaliga ega chiqqan Isroil terma jamoasi ikkinchi o'rinni band etdi. Ikkita oltin va bitta kumush medaliga sazovor bo'lgan franciyalik dzyudochilar esa kuchli uchlikka yakun yasashdi. 

Yaponiya, Braziliya, Kanada, Gollandiya, Mo'g'uliston, Argentina va SHveciya terma jamoalari dzyudochilari Ekaterinburg tatamilarida bitta oltin medalni qo'lga kiritishdi. Jami 22ta terma jamoaga musobaqaning kamida bitta bronza medali nasib etdi.