Endi Qashqadaryoda ham akademik eshkak eshish rivojlanadi

Suv sporti turlarini Qashqadaryo viloyatida ham keng targ'ib qilish, ayniqsa, sportning akademik eshkak eshish turini voha yoshlari orasida yanada ommalashtirish va rivojlantirish maqsadida Suv sporti turlari bo'yicha Respublika Oliy sporti mahorati maktabi, O'zbekiston “Rowing & Canoe” federaciyasi hamda Qashqadaryo viloyati jismoniy tarbiya va sport boshqarmasi tomonidan imzolangan qo'shma memorandumga muvofiq, viloyatdagi Suv sporti turlariga ixtisoslashtirilgan bolalar-o'smirlar sport maktabida akademik eshkak eshish bo'limi tashkil etildi.

O'zbekiston Respublikasi jismoniy tarbiya va sport vazirining tegishli buyrug'iga muvofiq, joriy yil 21-31 oktyabr kunlari sportning akademik eshkak eshish turi bo'yicha o'tkazilgan O'zbekiston chempionati bahslarida respublikamizning 8 ta viloyatidan jami 726 nafardan ortiq sportchi ishtirok etdi. Musobaqada qashqadaryolik sportchilar ham faol qatnashib, umumjamoa hisobida ilk bor 4-o'rinni qo'lga kiritdi.

O'zbekiston chempionati g'olib va sovrindorlari Qashqadaryo viloyatida Suv sporti turlari bo'yicha Respublika oliy sporti mahorati maktabi direktori K.Xolmatov hamda Jismoniy tarbiya va sport boshqarmasi mutasaddilari tomonidan munosib taqdirlandi.