Engil atletika bo'yicha “Barkamol avlod-2021” final bosqichi g'oliblari malum bo'ldi

Akademik licey va professional talim muassasalari o'quvchi-yoshlari o'rtasida bo'lib o'tayotgan sport festivalning ikkinchi final musobaqasida jami 200 nafarga yaqin ishtirokchi bellashdi.

Musobaqada sportchi o'smirlar va qizlar engil atletikaning 60 metrga yugurish, 200 metrga yugurish, 400 metrga yugurish, 800 metrga yugurish, 1500 metrga yugurish, 3000 metrga yugurish, 4x200 metrga va 4x400 metrga estafeta yugurish, to'siqlar osha yugurish, uzunlikka sakrash, balandlikka sakrash hamda uch hatlab sakrash kabi yo'nalishlarda o'z mahoratlarini sinovdan o'tkazishdi.

Musobaqa yakuniga ko'ra, umumjamoa hisobida Buxoro viloyati vakillari 1-o'rinni qo'lga kiritdi. 2-o'rin bilan Farg'onalik yoshlar taqdirlangan bo'lsa, 3-o'rin Namangan viloyati sportchi yoshlariga nasib etdi.

Eslatib o'tamiz, ayni damda kurash bo'yicha “Barkamol avlod-2021” sport musobaqalarining respublika final bosqichi Buxoro shahrida davom etmoqda.