Los-Anjeles-2028: engil atletika bo'yicha saralash tartibi va meyorlari tasdiqlandi

2028 yilning 15-30 iyul kunlari o'tadigan musobaqalarda atletlar belgilangan saralash meyorlarini bajarish yoki jahon reytingi orqali Olimpiada yo'llanmasini qo'lga kiritishi mumkin.

Yo'llanmalarning 40 foizi saralash meyorlari, 60 foizi esa jahon reytingi asosida taqsimlanadi.

Olimpiada dasturi

Erkaklar va ayollar o'rtasida 23 tadan yo'nalishda musobaqalar o'tkaziladi. Dasturdan 4×100 metr va 4×400 metrga aralash estafeta bahslari ham o'rin olgan. 4×100 metrga aralash estafeta Olimpiya o'yinlarida ilk bor o'tkaziladi.

Saralash tartibi

Yo'llanmalarning 40 foizi belgilangan meyorlarni bajargan atletlarga, 60 foizi esa jahon reytingi asosida beriladi. Meyorni bajarish yo'llanmani avtomatik ravishda kafolatlamaydi: kvotadan ortiq atlet meyorni bajargan taqdirda, eng yaxshi natijalar inobatga olinadi.

Har bir mamlakatdan bir yo'nalish bo'yicha ko'pi bilan uch nafar atlet saralashda hisobga olinadi.

Saralash muddatlari

- Marafon: 2026 yil 1 noyabrdan 2028 yil 30 aprelgacha.

- 10 000 metr, ko'pkurash, sportcha yurish va estafetalar: 2026 yil 19 dekabrdan 2028 yil 18 iyungacha.

- Qolgan yo'nalishlar: 2027 yil 19 iyundan 2028 yil 18 iyungacha.

Ayrim yo'nalishlar bo'yicha maxsus tartib

Marafon. 2028 yil 19 mart holatiga ko'ra, saralash reytingidagi dastlabki 56 nafar atlet yo'llanma oladi. Qolgan 15 ta o'rin belgilangan saralash tartibi asosida taqsimlanadi. Saralash davrida Platinum Label maqomidagi marafonlarda dastlabki besh o'rinni egallagan atletlar ham kirish meyorini bajargan deb hisoblanadi.

Sportcha yurish. 2028 yil 9 aprel kuni Xitoyning Xefey shahrida bo'lib o'tadigan Jahon sportcha yurish jamoaviy chempionatida dastlabki 12 o'rinni egallagan atletlar Olimpiada yo'llanmasini to'g'ridan-to'g'ri qo'lga kiritadi. Qolgan 36 ta o'rin jahon reytingi orqali taqsimlanadi.

Estafetalar. 2028 yil 22-23 aprel kunlari Bagama orollarida o'tadigan Jahon estafetalari musobaqasida dastlabki 14 o'rinni egallagan jamoalar Olimpiadaga yo'llanma oladi. Qolgan jamoalar saralash davridagi jahon natijalari ro'yxati asosida tanlanadi.