Total Chess. Abdusattorovdan "dahshatli" start. U faqat Bibisarani xafa qila oldi xolos

Uch xil vaqt nazorati, 24 nafar ishtirokchi 11 kun davomida Total Chess World Championship Tour bosh sovrini uchun bahs olib boryapti. 

Afsuski, musobaqaning ilk kuni o'tkazilgan blic bahslarida Nodirbek Abdusattorov omadsizlikka uchradi. Grossmeysterimiz 9 ta turda faqat qozog'istonlik ayol shaxmatchi Bibisara Assaubaevani mag'lubiyatga uchratdi. Armanistonlik Hayk Martirosyan, amerikalik Levon Aronyan, niderlandiyalik Yorden van Forest bilan durang o'ynadi. Qolgan partiyalarda esa germaniyalik Vinsent Keymer, ozarbayjonlik SHaxriyar Mamedyarov, amerikalik eng yosh grossmeyster Mishra Abhimanyu, polshalik Yan-Kshishtof Duda va vetnamlik Lem Lega imkoniyatni boy berdi. 

Natijada Nodirbek Abdusattorov 1 g'alaba, 3 durang, 5 mag'lubiyat bilan 2,5 ochko jamg'argan holda 24 ishtirokchi orasida 22-o'rinni egalladi. 23-pog'onadagi Yorden van Forest hisobida ham 2,5 ochko bor. Bibisara Assaubaeva 1 ta durang, 8 ta mag'lubiyat bilan so'nggi o'ringa joylashdi. 

To'qqiz imkoniyatdan 7 ochko jamg'argan norvegiyalik Magnus Karlsen blic bahslari g'olibiga aylandi. U yaqinda Nodirbek Abdusattorovni uyiga chaqirib, birgalikda mashg'ulot o'tkazdi. Mashg'ulot Magnus uchun zoe bo'lmabdi. Olti yarim ochko to'plagan Maksim Vashe-Lagrav ikkinchi, 6 ochkoga ega Levon Aronyan uchinchi o'rinni egalladi.      

Musobaqa formati:

Fast Classic — 45 daqiqa + har yurishga 30 soniya

Rapid — 15 daqiqa + 10 soniya

Blits — 3 daqiqa + 2 soniya

Bugundan besh kun davomida shaxmatchilar 4 ta guruhga bo'linib, Fast Classic formatida kurashadi. Guruh bosqichida g'alaba uchun 3, durang uchun esa 1 ochko beriladi. 17 noyabrdan pley-off bahslari boshlanadi. Unda shaxmatchilar bir-biriga qarshi blic, rapid va Fast Classic formatlarida o'ynaydi. Musobaqa 20 noyabr kuni yakunlanadi.

Umumiy mukofot jamg'armasi — 650 000 AQSH dollari. Turnir g'olibi 80 000 dollarni qo'lga kiritadi. 2027 yilda rasman yo'lga qo'yiladigan Total Chess jahon chempionati turining ilk sinovi aynan Budapeshtda bo'lib o'tadi.