Bugun Abdusattorov Total Chess turniridagi ishtirokini boshlaydi

Uch xil vaqt nazorati, 24 nafar ishtirokchi 11 kun davomida Total Chess World Championship Tour bosh sovrini uchun bahs olib boradi. Bu oddiy shaxmat musobaqasi emas. Unda ishtirokchilar uch xil vaqt nazoratida o'zaro hisob-kitob qiladi:

Fast Classic — 45 daqiqa + har yurishga 30 soniya

Rapid — 15 daqiqa + 10 soniya

Blits — 3 daqiqa + 2 soniya

Musobaqada dunyoning 24 nafar kuchli shaxmatchisi ishtirak etadi. Ular orasida Magnus Karlsen, Fabiano Karuana, Alireza Firuja, Arjun Erigaisi, Rameshbabu Praggnanandhaa, Anish Giri, Nodirbek Abdusattorov singari nomdor grossmeysterlar bor!

Turnirning ilk kuni 9 turdan iborat blic musobaqasi o'tkaziladi. 11-15 noyabr kunlari esa shaxmatchilar 4 ta guruhga bo'linib, Fast Classic formatida kurashadi. Guruh bosqichida g'alaba uchun 3, durang uchun esa 1 ochko beriladi.

17 noyabrdan pley-off bahslari boshlanadi. Unda shaxmatchilar bir-biriga qarshi blic, rapid va Fast Classic formatlarida o'ynaydi. Musobaqa 20 noyabr kuni yakunlanadi.

Umumiy mukofot jamg'armasi — 650 000 AQSH dollari. Turnir g'olibi 80 000 dollarni qo'lga kiritadi.

Bugungi ilk kungi blic bahslari Toshkent vaqti bilan soat 22:00 da boshlanadi.

2027 yilda rasman yo'lga qo'yiladigan Total Chess jahon chempionati turining ilk sinovi aynan Budapeshtda bo'lib o'tadi.