Bibisara qo'ng'iroq chalib boshlab bergan Clutch Chess turnirining ikkinchi kuni Javohir qanday natija qayd etdi?

Bu turnir Javohir uchun hindistonlik amaldagi jahon chempioni Gukesh Dommaradjuga qarshi Jahon toji uchun match oldidan so'nggi sinov bo'lmoqda. Musobaqaning mukofot jamg'armasi 425 000 AQSH dollarini tashkil etadi. 

Turnirning ikkinchi kunini Sindarov mag'lubiyat bilan boshladi. Hamyurtimiz hindistonlik Rameshbabu Pragnanandhani ilk partiyani yutqazib qo'ydi. Keyin esa qora donalarda o'ynaganiga qaramay, raqibini taslim etdi va ilk uchrashuvdagi mag'lubiyat uchun munosib revansh oldi. Ikkinchi turda Javohir AQSH vakili Fabiano Karuana bilan bir mag'lubiyat va bir durangga rozi bo'ldi. Uchinchi turdan o'rin olgan Javohir Sindarov - Hikaru Nakamura (AQSH) uchrashuvining har ikki partiyasida ham murosa yo'li tanlandi. 

SHu tariqa, grossmeysterimiz ikkinchi kungi bahslardan so'ng 8,5 ochko jamg'ardi va turnir jadvalida 2-o'rinni saqlab qoldi. Javohir o'z hisobiga hozircha 3000 AQSH dollari miqdoridagi mukofot pulini qo'shib qo'ydi. Fabiano Karuana hisobida ham 8,5 ochko bor. Birinchi turdan so'nggi o'rinda bo'lgan Rameshbabu Praggnanandha 11 ochko bilan yakka peshqadamga aylanib oldi. Hikaru Nakamura hisobida 8 ochko bor. 

Malumot uchun, turnirda har bir shaxmatchi 18 tadan rapid partiya o'ynaydi. Vaqt nazorati — 10 daqiqa va har bir yurishga 5 soniya qo'shib beriladi.

Turnirning o'ziga xos jihati — g'alaba uchun beriladigan ochkolar har kuni ortib boradi:

1-kun — 1 ochko

2-kun — 2 ochko

3-kun — 3 ochko

Demak, bugun o'tkaziladigan so'nggi kungi bitta g'alaba birinchi kundagi uchta g'alabaga teng bo'ladi. Yani, g'alabaga 3 ochko beriladi.