Engil atletika. Toshkentda MOQ sovrini uchun O'zbekiston chempionati start oldi

Respublika engil atletika markazi mezbonlik qilayotgan mazkur musobaqa kattalar, 19 hamda 17 yoshgacha bo'lgan sportchilar o'rtasida tashkil qilinmoqda. Unda atletlar bosqon uloqtirish, nayza uloqtirish, disk uloqtirish, yadro uloqtirish, shuningdek, uzunlikka va balandlikka sakrash yo'nalishlarida g'oliblik uchun kurash olib borishmoqda.

Kattalar o'rtasidagi bahslar Indoneziyada bo'lib o'tadigan Osiyo o'yinlari uchun terma jamoamiz tarkibini shakllantirish maqsadida tashkil etilayotgan bo'lsa, 19 yoshgacha bo'lgan sportchilar o'rtasidagi bellashuvlarda Osiyo va jahon chempionatlarida yurtimiz sharafini himoya qiladigan sportchilar nomi malum bo'ladi. 17 yoshgacha bo'lgan sportchilar o'rtasidagi musobaqada esa Argentinada o'tkaziladigan o'smirlar o'rtasidagi yozgi Olimpiya o'yinlarida qatnashadigan vakillarimiz saralab olinadi.

Bahslarda Respublikamizning barcha viloyatlaridan 289 nafar sportchi o'z omadini sinab ko'rmoqda.

Qo'shimcha sifatida shuni qayd etib o'tishimiz lozimki, yaqinda Milliy olimpiya qo'mitasi Prezidenti Umid Ahmadjonov tashabbusi bilan polvonlar yurti hisoblangan Surxondaryo hamda Qashqadaryo vohalaridan 51 nafar sportchi saralab olindi. Ikki kun davom etadigan musobaqada aynan ushbu sportchilarning ishtirokiga ham alohida etibor qaratiladi.