Eron FF Keyrushga 8 yillik hamkorlik uchun minnatdorchilik bildirdi

Osiyo Kubogi yarim finalida Yaponiyadan uchralgan 0:3 hisobidagi mag'lubiyat portuliyalik mutaxassis uchun Eron terma jamoasi bosh murabbiyi sifatida oxirgi o'yini bo'lib qoldi.

Ushbu qita birinchiligida Keyrush oltin medallarni qo'lga kiritishni maqsad qilgandi, biroq bu nasib etmadi. SHunga qaramay 8 yillik faoliyat uchun Eron futbol federaciyasi Karlush Keyrushga o'z minnatdorchiligini bildirdi. Kecha murabbiy Eron FFning Tehrondagi ofisiga tashrif buyurib rahbariyat bilan uchrashdi va o'zaro hamkorlikni to'xtatayotganini malum qildi.

Darvoqe, Yaponiyaga qarshi bahs Karlush Keyrush uchun forslar bosh murabbiyi sifatida 100-o'yin bo'ldi. Eron bilan 100ta bellashuv o'tkazgan Keyrush shundan 60tasida zafar quchdi, 27 bor durang o'ynab, 13 marta imkoniyatni boy berdi. Albatta, buni yaxshi natija desa bo'ladi.

Yana bir malumot shuki, terma jamoani eng uzoq muddat boshqargan ham aynan Karlush Keyrush bo'ldi. Endilikda uning Kolumbiya terma jamoasida ishlashi kutilyapti.