Ertaga Toshkentda shaxmat bo'yicha Prezident Kubogi turniri boshlanadi

O'n kun davomida dunyoning ko'zga ko'ringan grossmeysterlari mukofot jamg'armasi 75 000 AQSH dollarini tashkil etuvchi Prezident Kubogi musobaqasi bosh sovrini uchun o'zaro bahs olib borishadi. Ishtirokchilar FIDE reytingidagi o'rinlariga qarab A va V guruhlarida dona surishadi.  

Reglamentga ko'ra, A guruhida reytingi 2250 va undan yuqori shaxmatchilar qatnashadi. B guruhidan esa reytingi 2249 va undan past shaxmatchilar joy olgan. Klassik shaxmat bo'yicha o'tadigan ushbu musobaqada partiya 90 daqiqa va har bir yurish uchun 30 soniya vaqt qo'shib beriladi. 

Yurtimiz sharafini Nodirbek Abdusattorov, Javohir Sindarov, SHamsiddin Vohidov, Nodirbek Yakubboev singari taniqli grossmeysterlarimiz hamda istedodli yosh shaxmatchilarimiz himoya qiladi. Abdusattorov xalqaro turnirning birinchi raqamli ishtirokchisi sifatida saralangan. Eronlik Parham Maqsudlu ikkinchi, uning hamyurti Amin Tabatabayi uchinchi raqam ostida tasniflangan.   

A guruhida qatnashadigan Top-10 shaxmatchilar va ularning FIDE reytinglari:

1. GM Nodirbek Abdusattorov (O'zbekiston) – 2777  

2. GM Parham Maqudlu (Eron) – 2712  

3. GM Amin Tabatabayi (Eron) – 2686  

4. GM Javohir Sindarov (O'zbekiston) – 2682  

5. GM SHamsiddin Vohidov (O'zbekiston) – 2681  

6. GM Nihal Sarin (Hindiston) – 2676  

7. GM Nodirbek Yaqubboev (O'zbekiston) – 2668  

8. GM Puranik Abhimanyu (Hindiston) – 2652  

9. GM Murali Kartikeyan (Hindiston) – 2625  

10. GM Muniretinam Pranesh (Hindiston) – 2580