Eshitdik-da... SHkvirindan bo'shashi haqida ariza talab qilishdi

Jamoaning natija tomondan oqsayotganligi homiylik qilayotgan OKMK rahbariyatini ranjitgan ko'rinadi. O'yindan so'ng OKMK iqtisodiyot va moliya ishlari bo'yicha direktori “Olmaliq” klub bosh direktoriga  telefon qilib rahbariyat va murabbiylar ishdan bo'shashlik haqida ariza yozishlarini so'ragan. Biroz tushunarsiz holat. Futbol klubida bu kabi o'zgarishlar odatda klub Prezidenti tomonidan amalga oshiriladi. “Olmaliq”da Aleksandr Farmanov klub prezidenti hisoblanadi. “O'zbekiston qahramoni” unvoni sohibi bo'lgan bu inson futbolimiz rivoji uchun har doim boshqalarga o'rnak bo'lgan rahbarlardan biri hisoblanadi. Olmaliq shahrida nafaqat futbol, balki boshqa sport turlari ham faoliyat olib bormoqda. “Olmaliq” jamoasi o'tgan davr ichida respublikada o'z o'rni va nufuzini topib borayotgan yosh jamoalardan biridir. Afsuski, bu yil jamoaga nimadir bo'lgan ko'rinadi. Ko'p ming sonli muxlislariga ega jamoaning kelajagi nima bo'ladi? Umid qilamizki, bu jamoa faoliyati yaxshilanib chempionatimizda ijobiy natijalarga erishadi.

PS: “Olmaliq” jamoasi ikkinchi davrada o'z maydonida o'tayotgan uchrashuvlarga ham Toshkentdan qatnayotganligidan xabardormiz. SHuningdek, bir qator futbolchilar oldida klub qarzdorligi borligini ham eshitdik... Nima bo'lganda ham oliy ligada muntazam ishtirok etib kelayotgan jamoada vaziyat ijobiy tomonga o'zgarishiga ishonamiz. Aks holda jamoani keyingi yil quyi ligada ko'rishimiz mumkin bo'ladi.