Esports World Cup Chess. Nodirbek Abdusattorov qaytdi, u pley-off bosqichida!

D guruhidan joy olgan va NAVI jamoasi sharafini himoya qilayotgan Nodirbek Abdusattorov o'zi singari ilk uchrashuvida engilgan amerikalik Fabiano Karuanaga qarshi bahs olib bordi. Birinchi bahsda Nodirbek qora donalarda o'ynashiga qaramay g'alaba qozondi. 

Ikkinchi uchrashuvda dunyoning uchinchi raqamli shaxmatchisi bo'lib turgan Fabiano kambek amalga oshirib, muvozanatni tikladi. Hal qiluvchi armageddon partiyasida yosh grossmeysterimiz nomdor raqibini mag'lubiyatga uchratishga muvaffaq bo'ldi. Nodirbek g'oliblik uchun asosiy davogarlardan birini musobaqadan chiqarib yubordi.  

Bu juftlik g'olibini polshalik Yan-Krishtoff Duda kutib turgandi. Aynan shu bahs pley-off bosqichining so'nggi ishtirokchisini aniqlab berardi. Ikkala partiyada durang natija qayd etildi. Armageddon partiyasining beshinchi yurishida shaxmatda kamdan-kam uchraydigan holat kuzatildi. Duda kompyuter sichqonchasida sipohni ikkita oldinga suraman deb bitta qatorga yurib qo'ydi. Natijada debyutdayoq raqibiga bitta ot ustunligini taqdim etib qo'ygan Duda kurashni davom ettirmay, alamli mag'lubiyatini tan oldi.  

SHu tariqa, Nodirbek Abdusattorov Esports World Cup Chess turnirining guruh bosqichini muvaffaqiyatli yakunlab, ikkinchi o'rin bilan pley-offga, yani 1/8 finalga yo'l oldi. Ushbu guruhdan Magnus Karlsen birinchi o'rin bilan pley-offga chiqdi. 

Afsuski, musobaqaning asosiy to'riga saralash bahslari orqali etib kelgan Javohir Sindarov xitoylik grossmeyster Vey Yiga har ikki partiyada ham imkoniyatni boy berib, Esports World Cup Chess turniridagi ishtirokini yakunladi.