European Chess Club Cup. Abdusattorovda ketma-ket to'rtinchi g'alaba!

Erkaklar o'rtasidagi European Chess Club Cup musobaqasi o'z tarixida 39, ayollar ishtirokidagisi esa 28-marotaba tashkil etilyapti. Bu yilgi qita kubogida uch nafar grossmeysterimiz Evropa klublari tarkibida muvaffaqiyatli tarzda qatnashayotgani haqida xabar bergan edik.

Nodirbek Abdusattorov va Javohir Sindarov Ruminiyaning "SuperChess", Nodirbek Yakubboev esa Sloveniyaning "TAJFUN-ŠK Ljubljana" jamoalari sharafini himoya qilyapti. Kecha 5-turda "SuperChess" klubi Serbiyaning "SK JAVES Modra" jamoasini 5:1 hisobida dog'da qoldirdi. Abdusattorov Tomas Laurusasni, Sindarov esa Federik Yozefni mag'lubiyatga uchratib, jamoasining umumiy muvaffaqiyatiga hissa qo'shdi. 

Nodirbek Yakubboevning "TAJFUN-ŠK Ljubljana" jamoasi esa 5-turda CHernogoriyaning "Elektroprivreda" klubidan 4:2 hisobida ustun keldi. Yakubboev Nikita Petrov bilan durang o'ynadi. Turning markaziy uchrashuvi ikki peshqadam "Alkaloid" (Makedoniya) va "Turkish Airlines" (Turkiya) jamoalari o'rtasida o'tkazilib, 3:3 hisobidagi jangovar durang natija bilan yakunlandi. 

Beshinchi turdan so'ng karvonboshi o'zgardi. Beshta uchrashuvning barchasida g'alaba qozongan CHexiyaning "Novy Bor Chess Club" klubi 10 ochko bilan yakka peshqadamga aylanib oldi. "Turkish Airlines", "Alkaloid" va "C'Chartres Echecs" klublari hisobida 9 tadan ochko bor. "SuperChess" va "TAJFUN-ŠK Ljubljana" klublari 8 ochko bilan qo'shimcha ko'rsatkichlarga ko'ra mos ravishda 5 hamda 7-o'rinlarni band etishgan. 

Bugun 6-turda "SuperChess" "Tuxera Aquaprofit Nagykanizsai Sakk Klub" bilan, "TAJFUN-ŠK Ljubljana" klubi esa "Beer Sheva Chess Club" jamoasi bilan hisob-kitob qiladi.