Federaciyalarimiz shifokorlari ham koronavirusga qarshi kurashda samarali mehnat qilishmoqda

Afsuski, ushbu virus yurtimizni ham chetlab o'tmadi. Zamonamiz qahramonlari bo'lmish shifokorlarimiz hozirda ushbu pandemiyaga qarshi kurashga safarbar qilingan. SHifokorlarimiz yurtimizning turli hududlarida barpo etilayotgan maxsus karantin zonalarida hamyurtlarimizning salomatligi uchun kurash olib borishmoqda. 

SHunday sinovli kunlarda sport sohasida faoliyat olib borayotgan shifokorlar ham qo'llaridan kelgancha yordam berishmoqda. Ular orasida O'zbekiston kamondan otish federaciyasi dietologi, tibbiyot fanlari nomzodi Go'zal Toshmatovani ham uchratish mumkin. Go'zal Toshmatova ham yurtimizdagi minglab shifokorlar kabi hamyurtlarimiz salomatligi yo'lida kechayu kunduz mehnat qilmoqda.

O'zbekiston Milliy olimpiya qo'mitasi koronavirusga qarshi kurashda mehnat qilayotgan barcha tibbiyot xodimlari, harbiy xizmatchilar, milliy gvardiya, ichki ishlar xodimlariga jamoat tartibini saqlash va xalqimiz salomatligi yo'lida olib borayotgan xizmatlari uchun cheksiz minnatdorchilik izhor qiladi.

Aziz hamyurtim, o'zingiz va yaqinlaringizning salomatligi uchun uyda qoling!