FIDE 2024 yil hisobidan ilk reytingni elon qildi, Nodirbeklarning biri ko'tarildi

Erkak shaxmatchilar reytingini hamon jahon chempioni Magnus Karlsen boshqarmoqda. Norvegiyalik grossmeyster kuni kecha Samarqandda yakunlangan rapid va blic yo'nalishi bo'yicha FIDE jahon chempionatida g'oliblikni qo'lga kiritib, har ikki yo'nalishda o'z chempionligini himoya qilgandi. Amerikalik grossmeysterlar Fabiano Karuana va Hikaru Nakamura kuchli uchlikka yakun yasashgan. Karuana ochkolarini 2804 punktga etkazib oldi. O'tgan safargi reytingda bu ko'rsatkich 2794ni tashkil qilgandi.   

Samarqanddagi jahon chempionati natijalariga ko'ra, Top-10`talik reytingda bir nechta o'zgarishlar kuzatildi. Amerikalik Uesli So 8-pog'onadan 7-o'ringa ko'tarilib oldi. Yana bir AQSH vakili Lener Perez Dominges Top-10`talikda debyut qildi. U 8-o'ringa joylashdi. Niderlandiyadik Anish Giri 3 pog'ona pastlab, 10-o'ringa joylashgan bo'lsa, Samarqanddagi jahon chempionatida sharhlovchilik qilgan Vishvanatan Anand (Hindiston) Top-10`dan chiqib ketdi va 11-o'rinni egallab turibdi.  

O'zbekistonlik shaxmatchilar orasida eng yaxshi ko'rsatkichga Nodirbek Abdusattorov (2727) ega bo'lib turibdi. Rapid bo'yicha 2021 yilgi jahon chempioni o'tgan safargi o'rnini saqlab qoldi. Abdusattorov 2024 yilgi ilk reytingda 22-pog'onadan joy olgan. Umuman olganda, Top-100`talik reytingda o'tgan safar bo'lgani singari 4 nafar grossmeysterimiz bor. Javohir Sindarov (2701) va birinchi jahon chempionimiz Rustam Qosimjonov (2688) bir pog'onaga pastlagan holda, mos ravishda 36 va 49-o'rinlarni egallab turishibdi. Qatar Masters Chess-2023 g'olibi Nodirbek Yakubboev (2661) esa ikki pog'onaga yuqorilab, 75-o'ringa joylashdi. 

FIDE reytingi (Top-10) 2024 yil 1 yanvar kungi holat:

1 (1). Magnus Karlsen (Norvegiya, 2830)

2 (2). Fabiano Karuana (AQSH, 2804)

3 (3). Hikaru Nakamura (AQSH, 2788)

4 (4). Ding Liren (Xitoy, 2780)

5 (5). Yan Nepomnyashiy (Rossiya, 2769)

6 (6). Alireza Firuzja (Franciya, 2759)

7 (8). Uesli So (AQSH, 2757)

8. Lener Perez Dominges (AQSH, 2752) 

9 (9). Sergey Karyakin (Rossiya, 2750)

10 (7). Anish Giri (Niderlandiya, 2749)

O'zbek shaxmatchilarining reytingdagi o'rni:

22 (22). Nodirbek Abdusattorov (2727)

36 (35). Javohir Sindarov (2701)

49 (48). Rustam Qosimjonov (2688)

75 (77). Nodirbek Yakubboev (2661)

PS: Qavs ichida shaxmatchilarning o'tgan oydagi o'rni ko'rsatilgan