FIDE Jahon Kubogi. SHamsiddin Vohidov - Sergey Karyakin ilk bahsi bo'lib o'tdi + FOTO

Dunyoning eng kuchli shaxmatchisi Magnus Karlsen ham ishtirok etayotgan musobaqaning umumiy mukofot jamg'armasi 1 892 500 dollarni tashkil qiladi. G'olib yakunda 110 000 dollarga ega bo'ladi. 

Xabar berganimizdek, Jahongir Vohidov, SHamsiddin Vohidov, Nodirbek Yoqubboev, Javohir Sindarov va Nodirbek Abdusattorovdan iborat O'zbekiston erkaklar terma jamoasining bari ilk bosqichda (2 partiya) umumiy g'alabaga erishib, 1/64 finalga yo'l olishgandi. 

Etiborga molik jihati, aynan 1/64 final bosqichida o'tgan yili grossmeyster unvonini olgan 19 yoshli shaxmatchimiz SHamsiddin Vohidov dunyo tarixidagi ikkinchi yosh grossmeyter, 2015 yilgi FIDE Jahon Kubogi g'olibi, tezkor shaxmat bo'yicha jahon chempioni (2012 yil), blic bo'yicha jahon chempioni (2016) 2013 va 2019 yillarda jamoaviy jahon chempionatida ikki bor chempionlik tojini kiygan rossiyalik Sergey Karyakinga qarshi dona surdi. 

Karyakin to'g'ridan-to'g'ri 1/64 finaldan bahslarga kirishgan bo'lsa, SHamsiddin 1/128 finalda gruziyalik Luka Paychadzeni 2:0 hisobida mag'lubiyatga uchratgandi. Kecha o'tkazilgan ilk partiyada qora donalarda harakat qilgan Vohidov reytingning 14-pog'onasida borayotgan kuchli raqibiga imkoniyatni boy berdi. Bugun SHamsiddin ikkinchi partiyada oq donalarda harakat qiladi.