Finalda sensaciya! Muzetti Karlos Alkarazni taslim etdi

Hal qiluvchi final uchrashuvida ATP reytingida 62-pog'onadan joy olgan italiyalik Lorenco Muzetti dunyoning oltinchi raketkasi, ispaniyalik Karlos Alkarazni mag'lubiyatga uchratdi - 6/4, 6/7(6), 6/4. Alkaraz ikkinchi setda 5 ta matchboldan chiqib ketdi, ammo uchinchi hal qiluvchi setda baribir raqibiga yutqazib qo'ydi.

Etiborlisi, Muzetti faoliyatidagi ilk sovrinni aynan Gamburgda qo'lga kiritdi. Ikki soatu 49 daqiqa davom etgan bahsda Muzetti 2 ta, Alkaraz esa 1 ta eys zarbasini ijro etdi. Bu tennischilarning o'zaro o'tkazgan ilk uchrashuvi edi. 

Lorenco bir haftalik mehnatidan 331,125 evro mukofot puli hamda 500 reyting ochkosi ishlab oldi. U bugun elon qilingan reytingda 31-o'ringa ko'tarilib oldi. Muzetti bu yil ilk ATP sovrinini qo'lga kiritgan o'ninchi tennischiga aylandi.