Fomin o'zidan 520 pog'ona yuqoridagi raqibini engdi

Musobaqada istedodli tennischimiz Sergey Fomin muvaffaqiyatli ishtirok etyapti. Hamyurtimiz ilk davrada reytingda o'zidan 460 pog'ona yuqorida borayotgan rossiyalik Alibek Kachmazovni 6/1 7/6 hisobida mag'lub etib, 1/8 finalga yo'l olgandi. 

Fomin hozirgina yakuniga etgan nimchorak final bahsida yana bir reytingi yuqori tennischi, germaniyalik Sebastyan Fanzelovni 6/3, 6/3 hisobida taslim etib, chorak finalga yo'l oldi. Bu tennischilarning o'zaro o'tkazgan ilk uchrashuvi edi. Sergeyning chorak finaldagi raqibi turnirning 4-raketkasi, dunyo reytingida 285-pog'onadan joy olib turgan yaponiyalik Kaichi Uchida bo'ladi.      

Taqqoslash uchun, Sergey Fomin ATP reytingida 838, Fanzelov esa 318-o'rinni egallab turibdi. Hamyurtimiz bu g'alabasi bilan Denis Istomin uchun revansh oldi. Sebastyan kecha 1/16 final uchrashuvida aynan mamlakatimizning birinchi raketkasini ortiqcha qiyinchiliksiz mag'lub (6/1, 6/4) etgan edi.