Fomin Saarluisdagi turnirda o'z mahoratini namoyish qilyapti

Mukofot jamg'armasi 15 000 AQSH dollarini tashkil etuvchi musobaqada hamyurtimiz Sergey Fomin ham o'z imkoniyatini sinovdan o'tkazyapti. Mamlakatimizning ikkinchi raketkasi turnirdagi ishtirokini g'alaba bilan boshlab oldi. 

Fomin ilk davrada amerikalik Feliks Korvinga qarshi bahs olib bordi. Etmish to'rt daqiqa davom etgan bahsda hamyurtimiz ortiqcha qiyinchiliksiz g'alabaga erishdi - 6/1, 6/1. Sergey ATP reytingida 634, Feliks esa 673-o'rindan joy olgan.    

Bugun Sergey Fomin turnirning 1/8 finalida reytingning 1460-pog'onasida borayotgan avstriyalik Peter Goldsteynerga qarshi kortga chiqadi. Tennischimiz Saarluis turnirida sakkizinchi raqam ostida saralangan.