Freestyle Chess Grand Slam. Amaldagi jahon chempioni Gukesh ham yutqazdi, 1/4 final natijalari va 1/2 juftliklari + FOTO

Quvonarlisi, kecha o'tkazilgan 1/4 finalda yosh grossmeyterimiz Javohir Sindarov jahon reytingida 3-o'rinni egallab turgan amerikalik Hikaru Nakamurani qo'shimcha tay-brekda mag'lubiyatga uchratdi. Umumiy 3:1 hisobidagi g'alaba Sindarovni Freestyle Chess Grand Slam turnirining 1/2 finalga olib chiqdi. 

Nakamura endi 1/4 finalda Nodirbek Abdusattorov singari 5-o'rin uchun kurashni davom ettiradi. Sindarov esa 1/2 finalda boshqa bir amerikalik grossmeyster, dunyo reytingida ikkinchi o'rinni egallab turgan Fabiano Karuanaga qarshi bahs olib boradi. Fabiano 1/4 finalning har ikki uchrashuvida ham amaldagi jahon chempioni hindistonlik Gukesh Dommaradjudan ustun keldi. 

Yarim finalning ikkinchi juftligida Magnus Karlsen Javohir singari turnir kashfiyotiga aylangan germaniyalik Vinsent Keymer bilan hisob-kitob qiladi. Keymer 1/4 finalda jahon reytingida 7-pog'onadan joy olgan franciyalik Alireza Firuzdjani 1,5:0,5 hisobida engdi.    

To'qqizinchi o'rin sohibini aniqlab berayotgan uchrashuvda pley-offga chiqa olmagan ikki grossmeyster - armanistonlik Levon Aronyan hamda sloveniyalik Vladimir Fedoseev o'zaro hisob-kitob qildi. Ularning ilk partiyasida Aronyan oq donalarda g'alaba qozongandi. Kechagi javob uchrashuvida durang natija qayd etildi. Bugungi barcha uchrashuvlar bizning vaqt bilan soat 17:00da boshlanadi.