Freestyle Chess Grand Slam. Amaldagi jahon chempionida mag'lubiyat, 1/4 finalda kutilmagan natijalar

Xabar berganimizdek, Nodirbek Abdusattorov chorak finalning ilk uchrashuvida shaxmat afsonasi norvegiyalik Magnus Karlsenga imkoniyatni boy berib qo'ygandi. Saralash bahslarini juda yuqori darajada o'tkazgan Javohir Sindarov esa amerikalik Hikaru Nakamuraga qarshi kechgan murosasiz partiyada muqarrar mag'lubiyatdan chiqib ketib, durangga imzo chekdi. 

Amaldagi jahon chempioni hindistonlik Dommaradju Gukesh oq donalarda amerikalik Fabiano Karuanaga yutqazib qo'ydi. Saralash bahslarini qo'shimcha ko'rsatkichlarga ko'ra birinchi o'rinda yakunlagan Alireza Firuzdja ham kutilmaganda oq donalarda o'ynaganiga qaramay, germaniyalik Vinsent Keymerdan engildi. 

To'qqizinchi o'rin sohibini aniqlab berayotgan uchrashuvda pley-offga chiqa olmagan ikki grossmeyster - asli armanistonlik, hozirda AQSH sharafini himoya qilayotgan Levon Aronyan hamda sloveniyalik Vladimir Fedoseev o'zaro hisob-kitob qilyapti. Ularning ilk partiyasida Aronyan oq donalarda g'alaba qozondi.

Bugun barcha juftliklar o'rtasida ikkinchi partiya o'ynaladi. Birinchi uchrashuvda g'alaba qozongan grossmeysterlarni bugun durang natija ham 1/2 finalga olib chiqadi. Abdusattorovni faqat g'alaba, Sindarovni esa kamida durang tay-brekka o'tkazishi mumkin.