Freestyle Chess Grand Slam. Derbida Javohir ustun keldi, Nodirbek ham 1/4 finalga chiqdi

Dunyoning ko'zga ko'ringan grossmeysterlari qatnashayotgan musobaqada ikki shaxmatchimiz - Nodirbek Abdusattorov va Javohir Sindarov ham o'z mahoratini namoyish qilyapti. 17 fevralga qadar davom etadigan turnir aylana tizimda o'tkazilib, unda bir shaxmatchi qolgan hamma ishtirokchilar bilan rapid formatida o'zaro bahs olib boradi. 

Ikkinchi kun doirasida 4 ta tur uchrashuvi o'tkazildi. Nodirbek Abdusattorov 6-turda norvegiyalik Magnus Karlsenga qarshi dona surib, mag'lubiyat alamini totib ko'rdi. Javohir Sindarov birinchi kun Karlsenni taslim etgandi. Kecha Javohir Nodirbekka qarshi o'ziga xos o'zbek derbisida ham g'alaba qozondi. 

Abdusattorov ikkinchi kungi bahslarni ham biroz omadsiz o'tkazdi. Nodirbekning ayni paytda o'zining yaxshi sport formasida emasligi ko'rinib qolyapti. SHunga qaramay, u 1/4 final yo'llanmasini qo'lga kirita oldi. Bunga Levon Aronyan va Vladimir Fedoseevning saralash bahslarini sust o'tkazgani ham yordam berib yubordi.   

Javohir Sindarov 9 imkoniyatdan 6,5 ochko jamg'arib, 1/4 finalga 2-o'rin bilan yo'l oldi. Franciyalik Alireza Firuzdja ham 6,5 ochko to'pladi va qo'shimcha ko'rsatkichlarga ko'ra peshqadam sifatida chorak finalga chiqdi. Fabiano Karuana, Magnus Karlsen, Vinsent Keymer, Nodirbek Abdusattorov hamda amaldagi jahon chempioni Gukesh Dommaradju ham pley-offda chempionlik uchun kurashni davom ettiradi.