Freestyle Chess Grand Slam. Nodirbek 1-turdayoq amaldagi jahon chempioni bilan o'ynaydi

Dunyoning ko'zga ko'ringan grossmeysterlari qatnashadigan musobaqada ikki shaxmatchimiz - Nodirbek Abdusattorov va Javohir Sindarov ham o'z mahoratini namoyish qiladi. 17 fevralga qadar davom etadigan turnir aylana tizimda o'tkaziladi va unda bir shaxmatchi qolgan hamma ishtirokchilar bilan rapid formatida o'zaro bahs olib boradi. 

Qura natijasiga ko'ra, Nodirbek Abdusattorov 1-turdayoq amaldagi jahon chempioni hindistonlik Gukesh Dommaradjuga qarshi oq donalarda o'ynaydi. Bu ikki shaxmatchi 24 yanvar kuni Veyk-an-Zee shahri mezbonlik qilgan Tata Steel Chess turniri doirasida o'zaro to'qnash kelishgan va o'shanda durang natija qayd etilgandi. Javohir Sindarov esa 1-turda mezbonlar vakili Vinsent Keymerga qarshi qora donalarda harakat qiladi. 

Sindarovning Gukeshga qarshi uchrashuvi 4-turga to'g'ri kelmoqda. Ettinchi turda o'ziga xos o'zbek derbisiga guvoh bo'lamiz. Nodirbek oq donalarda Javohir bilan hisob-kitob qiladi. Beshinchi turda Sindarov, oltinchi turda esa Abdusattorov norvegiyalik Magnus Karlsenga qarshi bahs olib boradi.    

Bugun 5, ertaga esa qolgan 4 tur uchrashuvlari o'tkaziladi. Kuchli sakkizlikdan joy olgan shaxmatchilar pley-off bosqichiga yo'l oladi. Bu bosqichda har bir match ikki klassik partiyadan iborat bo'ladi. Agar ikki uchrashuv natijasiga ko'ra hisob teng bo'lib qolsa, g'olib tay-brekda aniqlanadi. Vaqt nazorati 90 daqiqa bo'lib, keyin har bir yurishga 30 soniyadan qo'shib boriladi.