Freestyle Chess Grand Slam Paris. Bugun pley-off boshlanadi. Nodirbek 1/4 finalda Magnus ga qarshi (barcha malumotlar)

Ikki kunlik rapid bahslaridan so'ng pley-off bosqichiga yo'l olgan shaxmatchilar malum bo'ldi. Dastlabki sakkiz o'rinni egallagan ishtirokchilar 1/4 finalga chiqishdi. 9-12 o'rinni band etgan Rameshbabu Pragnanandxa (Hindiston, 2758), Rixard Rapport (Vengriya, 2722), Dommaradju Gukesh (Hindiston, 2787) va Santosh Vidit (Hindiston, 2720) pley-offda quyi o'rinlar uchun bahs olib borishadi.  

Qolgan sakkiz ishtirokchi - Yan Nepomnyashhiy (Rossiya, 2757), Magnus Karlsen (Norvegiya, 2819), Maksim Vashe-Lagrav (Franciya, 2722), Arjun Erigaysi (Hindiston, 2782), Nodirbek Abdusattorov (O'zbekiston, 2773), Hikaru Nakamura (AQSH, 2734), Vinsent Keymer (Germaniya, 2649) va Fabiano Karuana (AQSH, 2776) 1/4 finalda chempionlik uchun kurashishadi. 

Ikki kunlik saralash bahslarida Yan Nepomnyashiy hamda Magnus Karlsen 8,5 ochkodan jamg'arib, turnir jadvalida birinchi va ikkinchi o'rinlarni band etishdi. Maksim Vashe-Lagrav 7 ochko bilan kuchli uchlikka yakun yasadi. Arjun Ergaisi va Nodirbek Abdusattorov 6,5 ochko bilan to'rtinchi va beshinchi pog'onalardan joy olishdi. 

Musobaqa reglamentiga ko'ra, 1-4 o'rinni egallagan shaxmatchilar 1/4 finaldagi raqibni o'zlari tanlash imkoniyatiga ega edilar. Magnus Karlsen Nodirbek Abdusattorovni tanladi. Saralash bosqichidagi o'zaro uchrashuvda Magnus hamyurtimizni mag'lubiyatga uchratgan edi.   

Freestyle Chess Grand Slam Paris. 1/4 final juftliklari

Yan Nepomnyashiy - Vinsent Keymer 

Magnus Karlsen - Nodirbek Abdusattorov 

Maksim Vashe-Lagrav - Fabiano Karuana 

Arjun Ergaisi - Hikaru Nakamura 

9-12 o'rinlar uchun 

Rameshbabu Pragnanandxa - Vidit Gujrathi

Rixard Rapport - Gukesh Dommaradju