Global Chess League. 1 000 000 AQSH dollari uchun kechayotgan turnirda Sindarovning natijasi qanday bo'lyapti?

Uchinchi mavsum Global Chess League musobaqasida dunyoning eng kuchli grossmeysterlari ishtirok etyapti. Turnirning umumiy mukofot jamg'armasi roppa-rosa 1 million AQSH dollarini tashkil qiladi. Har bir jamoada 6 nafar shaxmatchi (kamida 2 ayol; kamida 1 yosh (U-21) o'yinchi bo'lishi shart) dona surmoqda. 

Jamoalar bir-biri bilan aylanma tizimda ikki martadan o'ynashi haqida xabar bergan edik. Umumiy turlarlardan so'ng eng ko'p ochko to'plagan ikki jamoa finalda chempionlik uchun kurashadi. Sindarov shaxmat afsonasi Vishvanatan Anand, shuningdek, Vinsent Keymer, Stavrula Colakidu, Polina SHuvalova va Raunak Sadhvani bilan birgalikda Ganges Grandmasters jamoasi sharafini himoya qilyapti. 

Javohir Sindarov 9 ta turdan so'ng jamoasi safida 6 g'alaba, 1 durang va 2 mag'lubiyat qayd etgan. Bu uning jamoasidagi eng yaxshi natija. Lekin Ganges Grandmasters jamoasining 1-taxtadagi afsonasi Vishvanatan Anand haqida bunday deya olmaymiz. Sobiq jahon chempioni 9 raunddan 4 ta mag'lubiyat, 1 g'alaba va 4 durang natijaga ega. 

Bugungi raqib — Fabiano Karuana boshchiligidagi Fyers American Gambits jamoasi bo'ladi. Hal qiluvchi bahs bizning vaqt bilan soat 16:30da boshlanadi. Ganges Grandmasters jamoasi bugungi tur oldidan 4-o'rinni egallab turibdi. So'nggi turdan keyin 1 va 2-o'rin sohiblari chempionlik, 3 va 4-o'rin egalari bronza medallari uchun o'zaro dona suradi.