Grand Chess Tour: Sindarov 6-turda peshqadamlardan biri Karuana bilan o'ynadi

Dunyoning ko'zga ko'ringan grossmeysterlari ishtirok etayotgan turnir klassik shaxmat yo'nalishida 9 turdan iborat aylanma tizimida o'tkazilyapti. Javohir Sindarov hali g'alaba qozongani yo'q. U shu kungacha o'tkazilgan oltita uchrashuvning beshtasida raqiblari bilan durang o'ynab, bitta partiyada mag'lubiyat alamini totib ko'rdi. 

Javohir kecha oltinchi turda peshqadamlardan biri amerikalik Fabiano Karuanaga qarshi oq donalarda o'ynab, durangga imzo chekdi. Bu turdagi yagona g'alabani Anish Giri qayd etdi. Niderlandiyalik grossmeyster vatandoshi Yorden van Forestdan ustun keldi. Qolgan partiyalarda durang natija qayd etildi. 

Ettinchi tur oldidan turnir jadvalida amerikalik Uesli So 4 ochko bilan yakka peshqadam bo'lib turibdi. Fabiano Karuana, Vinsent Keymer, Rameshbabu Praggnanandha va Maksim Vashe-Lagrav 3,5 ochko bilan Top-5`dan joy olgan. Levon Aronyan, Sem Sevyan hisobida 3 ochkodan bor. Javohir Sindarov 2,5 ochko bilan qo'shimcha ko'rsatkichlarga ko'ra 8-pog'onani band etgan. Anish Giri hisobida ham 2,5 ochko bor. Bir ochkoga ega Yorden van Forest so'nggi 10-o'rinda bormoqda.   

Bugun 7-turda Javohir Sindarov qora donalarda germaniyalik Vinsent Keymerga qarshi bahs olib boradi. Bugungi uchrashuvlar ham bizning vaqt bilan soat 22:00da boshlanadi. 

To'liq ishtirokchilar tarkibi: Javohir Sindarov (O'zbekiston), Fabiano Karuana (AQSH), Pragnanandhaa Rameshbabu (Hindiston), Uesli So (AQSH), Levon Aronyan (AQSH), Anish Giri (Niderlandiya), Vinsent Keymer (Germaniya), Maksim Vashe-Lagrav (Franciya), Yorden van Forest (Niderlandiya), Sem Sevyan (AQSH).