Grand Chess Tour: Sindarovda nihoyat g'alaba, qora donalarda peshqadamlardan biri taslim etildi

Dunyoning ko'zga ko'ringan grossmeysterlari ishtirok etayotgan turnir klassik shaxmat yo'nalishida 9 turdan iborat aylanma tizimida o'tkazilyapti. Javohir Sindarov nihoyat, 7-turga kelib ilk g'alabasini qo'lga kiritdi. Bunga qadar u 5 durang va 1 mag'lubiyat qayd etgandi. 

Javohir ettinchi turda qora donalarda o'ynaganiga qaramay, peshqadamlardan biri germaniyalik Vinsent Keymerni mag'lubiyatga uchrata oldi. Bu turdagi yagona g'alaba ham aynan Sindarovga tegishli bo'ldi. Qolgan to'rtta partiyada tomonlar murosa yo'lini tanlashdi. 

Sakkizinchi tur oldidan turnir jadvalida amerikalik Uesli So 4,5 ochko bilan yakka peshqadamligini saqlab qoldi. Fabiano Karuana, Rameshbabu Praggnanandha va Maksim Vashe-Lagrav 4 ochko bilan Top-4`dan joy olgan. Kechagi g'alabasi evaziga Javohir 3,5 ochko bilan qo'shimcha ko'rsatkichlarga ko'ra 8-pog'onadan 5-o'ringa ko'tarilib oldi. Sindarovdan engilgan Vinsent Keymer ham 3,5 ochkoga ega va u 6-o'rinni band etgan. Levon Aronyan va Sem Sevyan hisobida ham 3,5 ochkodan bor. Anish Giri 3 ochko bilan 9-o'rindan joy olgan bo'lsa, 1,5 ochkoga ega Yorden van Forest so'nggi 10-o'rinda bormoqda.   

Bugun 8-turda Javohir Sindarov oq donalarda aynan autsayder Yorden van Forestga qarshi bahs olib boradi. Bugungi uchrashuvlar ham bizning vaqt bilan soat 22:00da boshlanadi. 

To'liq ishtirokchilar tarkibi: Javohir Sindarov (O'zbekiston), Fabiano Karuana (AQSH), Pragnanandhaa Rameshbabu (Hindiston), Uesli So (AQSH), Levon Aronyan (AQSH), Anish Giri (Niderlandiya), Vinsent Keymer (Germaniya), Maksim Vashe-Lagrav (Franciya), Yorden van Forest (Niderlandiya), Sem Sevyan (AQSH).