Grand Chess Tour: Super Chess Classic Romania 2026. Sindarovning 4-turdagi yurishini Bibisara boshlab berdi

Musobaqada yuqori reytingga ega o'n nafar grossmeyster bosh sovrin hamda katta mukofot pullari uchun bahsga kirishdi. Ular orasida "Nomzodlar turniri" g'olibi Javohir Sindarov ham bor. Hamyurtimiz 4-turda oq donalarda peshqadam Anish Giriga qarshi bahs olib bordi. Duranglar qiroli nomini olgan nilerlandiyalik shaxmatchi bu safar ham tezkor murosa yo'lini tanladi. 

Etiborlisi, kechagi partiyadagi ramziy yurishni qozog'istonlik ayol grossmeyster, blic bo'yicha jahon chempioni Bibisara Assaubaeva boshlab berdi. So'nggi o'yinlardagi biroz omadsiz ishtirokka Bibisaraning Javohirga hamroh bo'layotgani sabab bo'lmayotganmikan. Hayoli bo'linmayotganmikan deb o'ylaysiz-da! Mayli, keyingi turlarda Sindarovdan g'alaba kutib qolamiz.  

To'rtinchi turda germaniyalik Vinsent Keymer franciyalik Maksim Vashe-Lagravni mag'lubiyatga uchratib, turnir jadvalida 3 ochko bilan yakka peshqadam bo'lib oldi. Qolgan ikkita partiyada tomonlar durangga rozi bo'lishdi. Franciyalik Alireza Firuzdja 4-turda betob bo'lib qolgani bois ishtirok etmadi. Uning amerikalik Fabiano Karuanaga qarshi bahsi qoldirildi. 

Beshinchi tur oldidan Anish Giri, Yorden va Forest va Rameshbabu Praggnanandha 2,5 ochkodan jamg'arib, 2-4 o'rinlarni band etgan. Javohir Sindarov 1,5 ochko bilan qo'shimcha ko'rsatkichlarga ko'ra 8-pog'onadan joy olgan. Ruminiyalik Bogdan-Daniel Dik 1 ochko bilan 9-o'rindan joy olgan bo'lsa, autsayder Alireza Firuzdja hisobida 0,5 ochko bor. 

Bugun 5-turda Javohir Sindarov qora donalarda aynan Firuzdjaga qarshi bahs olib borishi kerak. Agar bugun ham Alireza uchrashuvga kelmasa, u holda franciyalik grossmeysterning barcha o'yinlardagi ochkolari nolga tenglashtiriladi. Yani, uni yutgan yoki durang o'ynagan raqiblarining ochkolari olib tashlanadi. Bugungi uchrashuvlar ham bizning vaqt bilan soat 18:00da boshlanadi. CHempion 100 000 dollarni qo'lga kiritadi.