Grand Swiss 2025. Abdusattorov karvonboshi bilan o'ynadi, Afruza peshqadamlar safida

Musobaqaning asosiy maqsadi — dunyo reytingining TOP-100 taligiga kirgan kuchli shaxmatchilar orasidan to'rt nafar talabgorni (2 erkak va 2 ayol shaxmatchi) jahon shaxmat toji uchun bo'ladigan “Talabgorlar turniri”ga saralab olishdan iborat.

Turnirning 4-turida Nodirbek Abdusattorov (2748) qora donalarda musobaqada 100 foizlik ko'rsatkich bilan peshqadamlik qilib kelayotgan eronlik Parham Maqsudluga qarshi bahs olib bordi va durangga imzo chekdi. Bu bilan OPEN turnirida ochko yo'qotmagan ishtirokchi qolmadi. 

Quvonarlisi, Nodirbek Yakubboev (2681) ham Abdusattorov singari o'z ochkolarini 3 taga etkazib oldi. U 4-turda qora donalarda o'ynaganiga qaramay, ukrainalik grossmeyster Yuriy Kuzubov (2600)ni chiroyli tarzda mag'lubiyatga uchratdi. Samarqanddagi turnirni omadsiz o'tkazayotgan Javohir Sindarov (2722) uchinchi durangini qayd etdi. Uchinchi turda  kutilmaganda ukrainalik Ivan CHeparinov (2627)ga yutqazib qo'ygan Javohir kecha 4-turda qora donalarda belgiyalik Daniel Dardha (2624) bilan murosaga keldi. 

Bu turda shaxmatchilarimizdan Muhiddin Madaminov (2560) armanistonlik SHant Sargsyan (2653)ga, Abdimalik Abdisalimov (2488) serbiyalik Velimir Ivich (2630)ga, Ortiq Nig'matov greciyalik Nikolas Teodoru (2646)ga, Jahongir Vohidov serbiyalik Aleksandar Injich (2650)ga imkoniyatni boy berdi. Muhammadzohid Suyarov (2482) va SHamsiddin Vohidov (2645) 4-turda raqiblari bilan durang o'ynashdi. 

Amaldagi jahon chempioni Gukesh Dommaradju (2767) hind derbisida Arjun Ergaisi (2771) bilan durangga imzo chekdi. Rameshbabu Praggnanandha (2785) amerikalik Mishra Abhimanyu (2611) bilan durang o'ynadi. Beshinchi tur oldidan Parham Maqsudlu 3,5 ochko bilan peshqadamligini saqlab qoldi. O'n uch nafar ishtirokchi hisobida 3 tadan ochko bor. Qo'shimcha ko'rsatkichlarga ko'ra Mishra Abhimanyu va turkiyalik Yagiz Erdogmuz kuchli uchlikdan joy olishgan. Nodirbek Abdusattorov 3 ochko bilan 8, Nodirbek Yakubboev 13-o'rinni band etgan. 

WOMENS, yani ayollar guruhida hamyurtimiz Gulruhbegim Tohirjonova (2372) reytingda o'zidan yuqorida borayotgan ukrainalik Yuliya Osmak (2478) bilan durang o'ynadi. Afruza Hamdamova amerikalik grossmeyster, bir necha karra AQSH chempioni Irina Krishni mag'lub etishni uddaladi va ochkolarini 3 taga etkazib oldi. Madinabonu Xalilova (2148) bu turda qozog'istonlik Kseniya Balabaeva (2383) bilan murosaga keldi. Umida Omonova (2252) qora donalarda o'ynaganiga qaramay, reytingda o'zidan yuqorida turgan gruziyalik Meri Arabidze (2444)ni mag'lub etishni uddaladi. Guldona Karimova (2324) bolgariyalik grossmeyster, jahon chempioni Antoanetta Stefanova (2395)ga yutqazib qo'ydi.   

WOMENS guruhida 4-turdan keyin FIDE bayrog'i ostida o'ynayotgan rossiyalik Katerina Lagno (2505) va hindistonlik Rameshbabu Vayshali (2452) 3,5 ochkodan jamg'arib, turnir jadvalida qo'shhokimlik qilishyapti. Ozarbayjonlik Ulviya Fatalieva (2385), germaniyalik Dinara Vagner (2400), hamyurtimiz Afruza Hamdamova, bolgariyalik Antoanetta Stefanova va ruminiyalik Irina Bulmaga (2400) hisobida 3 tadan ochko bor.