Grand Swiss 2025. Abdusattorov peshqadamga, Guldona jahon chempioniga qarshi (4-tur juftliklari)

Uchinchi turdan so'ng turnir jadvalida yakka peshqadamlik qilayotgan eronlik grossmeyster Parham Maqsudlu (2692) to'rtinchi turda birinchi taxtada hamyurtimiz Nodirbek Abdusattorov (2748)ga qarshi oq donalarda o'ynaydi. Parham o'tgan turda franciyalik Alireza Firuzjani taslim etgandi. Aynan Maqsudlu 3 ta uchrashuvning barchasida g'alaba qozongan yagona ishtirokchi bo'lib turibdi. Agar bugun Abdusattorov Maqsudluni mag'lub eta olsa, turnir jadvalida peshqadam bo'lib olishi mumkin.   

Uch imkoniyatdan 2 ochko to'plagan Nodirbek Yakubboev qora donalarda o'zi bilan bir xil ochkoga ega ukrainalik Yuriy Kuzubovga qarshi bahs olib boradi. Ikki durang va bir mag'lubiyatga ega Javohir Sindarov qora donalarda belgiyalik Daniel Dardha bilan hisob-kitob qiladi. 

Ayollar o'rtasidagi turnirda shaxmatchi-qizlarimiz orasida eng yaxshi natijaga ega bo'lib turgan Guldona Karimova (2324) 4-turda bolgariyalik jahon chempioni Antoaneta Stefanovaga qarshi bahs olib boradi. Guldona 2 ochko bilan qo'shimcha ko'rsatkichlarga ko'ra 12-o'rinni egallab turibdi. Beshinchi o'rindagi ozarbayjonlik Ulviya Fatalieva hisobida ham 2 ochko bor.

Ikki ochkoga ega yana bir vakilamiz Afruza Hamdamova bugun 4-turda bir necha karra AQSH chempioni Irina Krush bilan to'qnash keladi. To'rtinchi tur oldidan xuddi erkaklar turnirida bo'lgani kabi yagona peshqadam yuzaga keldi. Hindistonlik Rameshbabu Vayshali (2452) 3 ochko bilan yakka karvonboshilik qilmoqda. To'rt nafar ishtirokchi 2,5 ochkodan jamg'argan.