Grand Swiss 2025. Abdusattorov va Gukeshda g'alaba, ochko yo'qotmagan bir shaxmatchi qoldi

Musobaqaning asosiy maqsadi — dunyo reytingining TOP-100 taligiga kirgan kuchli shaxmatchilar orasidan to'rt nafar talabgorni (2 erkak va 2 ayol shaxmatchi) jahon shaxmat toji uchun bo'ladigan “Talabgorlar turniri”ga saralab olishdan iborat.

Turnirning 3-turida Nodirbek Abdusattorov (2748) oq donalarda hindistonlik Puranik Abhimanyu (2640)ni mag'lubiyatga uchratdi. Bu uning turnirdagi ikkinchi g'alabasi bo'ldi. Javohir Sindarov (2722) ketma-ket ikkita durangdan keyin biroz kutilmaganda ukrainalik Ivan CHeparinov (2627)ga imkoniyatni boy berib qo'ydi. 

Nodirbek Yakubboev (2681), Muhiddin Madaminov (2560), Muhammadzohid Suyarov (2482), Abdimalik Abdisalimov (2488) 3-turda raqiblari bilan durang o'ynashdi. Ortiq Nig'matov (2488) reytingda o'zidan ancha yuqorida turgan serbiyalik Velimir Ivich (2630)ni mag'lub etishga muvaffaq bo'ldi.  

WOMENS, yani ayollar guruhida hamyurtimiz Gulruhbegim Tohirjonova (2372) ketma-ket ikki mag'lubiyatdan keyin nihoyat g'alaba qozondi. Bu safar u qora donaralarda Belen Barrera Gomesdan ustun keldi. Afruza Hamdamova, Guldona Karimova Madinabonu Xalilova kuchli raqibalari bilan murosaga kelishdi. Ayniqsa, Madinabonu qora donalarda o'ynaganiga qaramay, uch karra jahon chempioni, ayollar o'rtasida 2600 reytingni birinchi bo'lib zabt etgan Anna Muzichuk bilan durang o'ynadi. Umida Omonova bu turda tajribali Anna Usheninaga yutqazib qo'ydi. 

Amaldagi jahon chempioni Gukesh Dommaradju (2767) 3-turda qora donalarda ispaniyalik Daniil Yuffa (2646)ni mag'lubiyatga uchratdi. Uchinchi tur oldidan uch ishtirokchi - sloveniyalik Anton Demchenko (2620), franciyalik Alireza Firuzdja (2754) va eronlik Parham Maqsudlu (2692) yuz foizlik natija bilan turnir jadvalida peshqadamlik qilishayotgandi. Uchinchi turda etakchilar o'zaro to'qnash kelishdi. Parham Maqsudlu qora donalarda harakat qilganiga qaramay, Firuzdjani mag'lub etishni uddaladi. Demchenko esa hindistonlik Arjun Ergaisiga yutqazib qo'ydi. Ochko yo'qotmagan birgina Maqsudlu qoldi. 

Amerikalik Mishra Abhimanyu, polshalik SHimon Gumulyarz, Gukesh Dommaradju, Rameshbabu Praggnanandha, Nodirbek Abdusattorov va Arjun Ergaisi 2,5 ochkodan jamg'arib, 2-7 -o'rinlarni band etishgan. Jami 33 nafar ishtirokchi 2 ochkodan to'plagan. Ular orasida Nodirbek Yakubboev ham bor.