Grand Swiss. Grossmeysterlarimizning barida durang

Turnirning umumiy mukofot jamg'armasi 600 000 (460 000 erkaklar, 140 000 ayollar uchun) AQSH dollarini tashkil etib, unda dunyoning 164 (114 erkak, 50 ayol shaxmatchilari) nafar grossmeysterlari g'oliblik yo'lida dona surishyapti. Ular qatorida hamyurtlarimizdan Nodirbek Abdusattorov, Javohir Sindarov, Nodirbek Yakubboev va SHamsiddin Vohidovlar ham o'z imkoniyatlarini sinab ko'rishmoqda.

Musobaqa shveycarcha tizimda o'tkazilayotgan bo'lib, kecha grossmeysterlar 8-turda o'zaro munosabatlariga oydinlik kiritib olishdi. Bu turda hamyurtlarimizning bari o'z partiyalarini durang bilan yakunlashdi. SHaxmatchilarimiz orasida eng yaxshi natija qayd etib turgan Javohir Sindarov (2658) qora donalarda reytingda o'zidan yuqorida turgan angliyalik Nikita Vityugov (2711) bilan murosaga keldi. 

Nodirbek Yakubboev (2616) oq donalarda reytingda o'zidan yuqorida joylashgan Praggnanandha (Hindiston, 2738) bilan durang o'ynadi. Birinchi raqamli shaxmatchimiz Nodirbek Abdusattorov (2716) oq donalarda o'ynashiga qaramay, Ivan Sarich (Xorvatiya, 2647) qarshiligini sindira olmadi. SHamsiddin Vohidov (2578) esa oq donalarda Ruslan Ponomaryov (Ukraina, 2641) bilan durangga imzo chekdi. 

Olti nafar shaxmatchi 8 imkoniyatdan 6 ochkodan jamg'arib, turnir jadvalida qo'shhokimlik qilishyapti. Javohir Sindarov 5 ochko bilan 15-o'rinni band etgan. To'rt yarim ochkoga ega Nodirbek Yakubboev 26-pog'onaga ko'tarildi. Nodirbek Abdusattorov 4,5 ochko bilan qo'shimcha ko'rsatkichlarga ko'ra 41, 3,5 ochkoga ega SHamsiddin Vohidov esa 114 ishtirokchi orasida 81-pog'onadan joy olgan. Bugun shaxmatchilar 9-tur uchrashuvlarida yuzma-yuz kelishadi. 

Bugun o'tkaziladigan 9-tur juftliklari:

Javohir Sindarov (2658) - Maksim Vashe-Lagrav (Franciya, 2727)

Benyamin Gledura (Vengriya, 2633) - Nodirbek Abdusattorov (2716)

Sem SHankland (AQSH, 2698) - Nodirbek Yakubboev (2616)

Kiril SHevchenko (Ruminiya, 2671) - SHamsiddin Vohidov (2578)