Grand Swiss. Ikki grossmeysterimizda mag'lubiyat, yana ikkisida durang

Turnirning umumiy mukofot jamg'armasi 600 000 (460 000 erkaklar, 140 000 ayollar uchun) AQSH dollarini tashkil etib, unda dunyoning 164 (114 erkak, 50 ayol shaxmatchilari) nafar grossmeysterlari g'oliblik yo'lida dona surishyapti. Ular qatorida yosh grossmeysterlarimizdan Nodirbek Abdusattorov, Javohir Sindarov, Nodirbek Yakubboev va SHamsiddin Vohidovlar ham o'z imkoniyatlarini sinab ko'rishmoqda.

Musobaqa shveycarcha tizimda o'tkazilayotgan bo'lib, kecha grossmeysterlar 7-turda o'zaro munosabatlariga oydinlik kiritib olishdi. SHaxmatchilarimiz orasida eng yaxshi natija qayd etib turgan Javohir Sindarov (2658) oq donalarda reytingda o'zidan yuqorida turgan hindistonlik Gujrathi Vidit (Hindiston, 2716)ga imkoniyatni boy berib qo'ydi. Tur oldidan 2-o'rinni egallab turgan Sindarov kechagi mag'lubiyatdan so'ng 13-pog'onaga tushib ketdi. Bu uning musobaqadagi ilk mag'lubiyati bo'ldi. Vidit aksincha, Javohir ustidan qozongan g'alabasi evaziga 5,5 ochko bilan yakka peshqadamga aylanib oldi. 

Nodirbek Yakubboev (2616) qora donalarda reytingda o'zidan yuqorida joylashgan ruminiyalik Bogdan-Daniel Dyak (Ruminiya, 2701)ga yutqazib qo'ydi. Birinchi raqamli shaxmatchimiz Nodirbek Abdusattorov (2716) esa bu turda qora donalarda Evgeniy Naer (Rossiya, 2648) bilan murosaga keldi. SHamsiddin Vohidov (2578) ham qora donalarda Amin Bassem (Misr, 2680) bilan durangga imzo chekdi. 

O'n bir nafar shaxmatchi 7 imkoniyatdan 5 ochkodan jamg'argan. Sindarov 4,5 ochko bilan 13-o'ringa, 4 ochkoga ega Nodirbek Yakubboev 10-o'rindan 29-pog'onaga pastladi. Nodirbek Abdusattorov 4 ochko bilan qo'shimcha ko'rsatkichlarga ko'ra 38, 3 ochkoga ega SHamsiddin Vohidov esa 114 ishtirokchi orasida 81-pog'onadan joy olgan. Bugun shaxmatchilar 8-tur uchrashuvlarida yuzma-yuz kelishadi.