Grand Swiss. Ikki Nodirbekda g'alaba, ular sovrinli o'rinlar uchun kurashga qaytishdi

Turnirning umumiy mukofot jamg'armasi 600 000 (460 000 erkaklar, 140 000 ayollar uchun) AQSH dollarini tashkil etib, unda dunyoning 164 (114 erkak, 50 ayol shaxmatchilari) nafar grossmeysterlari g'oliblik yo'lida dona surishyapti. Ular qatorida yosh grossmeysterlarimiz Nodirbek Abdusattorov, Javohir Sindarov, Nodirbek Yakubboev va SHamsiddin Vohidovlar ham o'z imkoniyatlarini sinab ko'rishmoqda.

Musobaqa shveycarcha tizimda o'tkazilayotgan bo'lib, kecha grossmeysterlar 9-turda o'zaro munosabatlariga oydinlik kiritib olishdi. SHaxmatchilarimiz orasida eng yaxshi natija qayd etib turgan Javohir Sindarov (2658) oq donalarda reytingda o'zidan yuqorida turgan franciyalik Maksim Vashe-Lagrav (2727) bilan durangga imzo chekdi. SHamsiddin Vohidov (2578) qora donalarda Kiril SHevchenko (Ruminiya, 2671)ga yutqazib qo'ydi.

Quvonarlisi, bu turda ikkala Nodirbek ham qora donalarda harakat qilishiga qaraymay, raqiblarini mag'lub etishni uddaladi. Nodirbek Yakubboev (2616) reytingda o'zidan yuqorida borayotgan Benyamin Gledura (Vengriya, 2633)dan, Nodirbek Abdusattorov (2716) esa Sem SHankland (AQSH, 2698)dan ustun keldi. Ushbu g'alabadan so'ng ular sovrinli o'rinlar uchun kurashga qo'shilishdi. 

Olti nafar shaxmatchi 9 imkoniyatdan 6,5 ochkodan jamg'arib, turnir jadvalida qo'shhokimlik qilishyapti. Javohir Sindarov 5,5 ochko bilan 13-o'ringa ko'tarilib oldi. Kechagi g'alabadan so'ng ochkolarini 5,5 taga etkazib olgan Nodirbek Yakubboev 26-pog'onadan 15, Nodirbek Abdusattorov esa 41-o'rindan 26-pog'onaga yuqoriladi. 3,5 ochko bilan qolgan SHamsiddin Vohidov esa 114 ishtirokchi orasida 92-pog'onadan joy olgan. 

Bugun shaxmatchilar 10-tur uchrashuvlarida yuzma-yuz kelishadi. Etiborga molik jihati shundaki, bu turda ikki grossmeysterimiz Nodirbek Abdusattorov va Javohir Sindarov o'zaro to'qnash kelishadi. Abdusattorov bugun oq donalarda harakat qiladi. Nodirbek Yakubboev esa franciyalik taniqli grossmeyster Eten Bakroga qarshi oq donalarda o'ynaydi.  

Bugun o'tkaziladigan 10-tur juftliklari:

Nodirbek Abdusattorov (2716) - Javohir Sindarov (2658) 

Nodirbek Yakubboev (2616) - Eten Bakro (Franciya, 2669)  

SHamsiddin Vohidov (2578) - Aleksandr Donchenko (Germaniya, 2676)