Grand Swiss. Sindarov g'alaba evaziga peshqadamga aylandi, ikki Nodirbek va SHamsiddinda durang

Musobaqaning umumiy mukofot jamg'armasi 600 000 (460 000 erkaklar, 140 000 ayollar turniri uchun) AQSH dollarini tashkil etib, unda dunyoning 164 (114 erkak, 50 ayol shaxmatchilari) nafar grossmeysterlari g'oliblik yo'lida dona surishyapti. Ular qatorida yosh grossmeysterlarimizdan Nodirbek Abdusattorov, Javohir Sindarov, Nodirbek Yakubboev va SHamsiddin Vohidovlar ham sovrinli o'rinlar uchun bahs olib borishmoqda. 

Musobaqa shveycarcha tizimda o'tkazilayotgan bo'lib, kecha turnirda grossmeysterlar 6-turda o'zaro munosabatlariga oydinlik kiritib olishdi. SHaxmatchilarimiz orasida eng yaxshi natija qayd etib turgan Javohir Sindarov (2658) qora donalarda o'ynashiga qaramay, reytingda o'zidan yuqorida turgan amerikalik Samuel Sevian (2698)ni mag'lubiyatga uchratdi. Nodirbek Yakubboev (2616) oq donalarda reytingda o'zidan yuqorida joylashgan germaniyalik Vinsent Keymer (2717) bilan durang o'ynadi. 

Birinchi raqamli shaxmatchimiz Nodirbek Abdusattorov (2716) bu turda oq donalarda hindistonlik CHitambaram Aravindh (2649) bilan murosaga keldi. SHamsiddin Vohidov (2578) esa oq donalarda niderlandiyalik Maks Varmerdam (2636) bilan durangga imzo chekdi. 

Etiborga molik jihati shundaki, mag'lubiyatsiz odimlayotgan Javohir Sindarov kechagi g'alabasi evaziga 4,5 ochko bilan turnir jadvalida qo'shimcha ko'rsatkichlarga ko'ra ikkinchi o'ringa ko'tarilib oldi. Serbiyalik peshqadam Aleksandr Predke hisobida ham 4,5 ochko bor. Sakkiz nafar shaxmatchi 4,5 tadan ochko jamg'arishgan. To'rt ochkoga ega Nodirbek Yakubboev kuchli o'ntalikka yakun yasab bergan. Nodirbek Abdusattorovda 3,5, SHamsiddin Vohidov hisobida esa 2,5 ochko bor. 

Bugun shaxmatchilar uchun dam olish kuni sifatida elon qilingan.

Ertaga o'tkaziladigan 7-tur juftliklari:

Javohir Sindarov (2658) - Gujrathi Vidit (Hindiston, 2716)

Bogdan-Daniel Dyak (Ruminiya, 2701) - Nodirbek Yakubboev (2616)

Evgeniy Naer (Rossiya, 2648) - Nodirbek Abdusattorov (2716)

Amin Bassem (Misr, 2680) - SHamsiddin Vohidov (2578)