Grossmeysterlarimiz Jahon kubogining uchinchi bosqichida qanday natija qayd etishdi?

Dunyoning 206 nafar shaxmatchisi qatnashishni boshlagan nufuzli musobaqaning 1/32 final bosqichida ilk uchrashuvlar bo'lib o'tdi. Afsuski, to'rt grossmeysterimizdan hech biri ilk bahsda g'alaba qozona olmadi. Nodirbek Abdusattorov meksikalik Xose Martines Alkantaraga yaxshi imkoniyatga ega bo'la turib, yakunda raqibiga imkoniyatni boy berib qo'ydi.

SHamsiddin Vohidov reytingda o'zidan yuqorida borayotgan hindistonlik Arjun Eragisiga yutqazib qo'ydi. Qolgan ikki shaxmatchimiz ilk bahsda durangga rozi bo'lishdi. Javohir Sindarov greciyalik Nikolas Teodoru, Nodirbek Yakubboev esa vetnamlik Tay Van Nguen bilan murosaga keldi. 

Grossmeysterlarimizning uchinchi bosqichdagi ilk natijalari: 

Nodirbek Abdusattorov - Xose Martines Alkantara (Meksika) — 0:1 

Javohir Sindarov - Nikolas Teodoru (Greciya) — 0,5:0,5

Nodirbek Yakubboev - Tay Van Nguen (Vetnam) — 0,5:0,5

SHamsiddin Vohidov - Arjun Eragisi (Hindiston) — 0:1

Nomzodlar turniri yo'llanmasi uchun kechayotgan Jahon kubogining bugungi uchinchi bosqich ikkinchi uchrashuvlari bizning vaqt bilan soat 14:30da boshlanadi.