Gulistondan maxsus reportaj: Baxtsiz hodisadan jabr ko'rganlar o'rtasida qiziqarli musobaqalar o'tkazilmoqda

Jumladan, Guliston shahrida joylashgan Olimpiya zaxiralari maktab-internatiga joylashtirilgan 700 nafarga yaqin aholi bugun tongni uyushgan holda ertalabki badantarbiya mashg'ulotlari bilan boshladi.

SHundan keyin, ayollar va bolalar o'rtasida o'ziga xos estafeta musobaqalariga start berildi. Ishtirokchilar jamoalarga bo'lingan holda arqon tortishish va estafetaning boshqa yo'nalishlari bo'yicha o'zaro bellashishmoqda.

SHuningdek, yoshlar va havaskorlar o'rtasida stol tennisi, badminton, voleybol, basketbol, shaxmat va shashka bo'yicha musobaqalar ham tashkillashtirilmoqda. Musobaqa yakunida g'olib va sovrindorlar mutasaddilar tomnidan taqdirlanishadi.

Kecha ham kun davomida stol tennisi, shaxmat va shashka bo'yicha musobaqalar o'tkazilgan edi. Musobaqalar yakunida g'oliblarga maxsus esdalik sovg'alari topshirildi.

Xabaringiz bor, ayni paytda Sardoba fojeasidan jabr ko'rgan mahalliy aholi uchun respublikamizning barcha hududlaridan insonparvarlik yordamlari jo'natilmoqda. «Saxovat karvonlari» Guliston shahrida mutasaddi xodimlar tomonidan kutib olinib, faollar bilan birgalikda sardobaliklarga tarqatilmoqda.

Jismoniy tarbiya va sport vazirligi Matbuot xizmati