Gulruhbegim Tohirjonova AQSH chempionati kumush medali sohibasi!

AQSH sharafini himoya qilayotgan hamyurtimiz Gulruhbegim Tohirjonova (2374) 11 imkoniyatdan 7,5 ochko jamg'arib, kumush medal sohibasiga aylandi. Karissa Yip (2418) 8,5 ochko bilan AQSHning 2024 yilgi chempioni bo'ldi. U endi uch karra AQSH chempioni. Alise Li (2395) esa 7 ochko bilan bronza medaliga ega chiqdi. 

Gulruhbegim Tohirjonova AQSH vice-chempioni bo'lish barobarida ayollar o'rtasidagi jahon Kubogida qatnashish huquqini ham qo'lga kiritdi. SHuningdek, umumiy mukofot jamg'armasi 152 000 dollarni tashkil qilgan musobaqadagi ishtirokidan 30 000 AQSH dollari ham ishlab oldi. 

Mukofot jamg'armasi 250 000 dollarni tashkil etgan erkaklar o'rtasidagi AQSH chempionatida dunyoning ikkinchi raqamli shaxmatchisi bo'lib turgan Fabiano Karuana (2805) chempionlik shohsupasiga ko'tarildi. Karuana 11 imkoniyatdan 7 ochko to'pladi hamda 62 000 dollar mukofot pulini ham qo'lga kiritdi.