Gulruhbegim Tohirjonova AQSHga kim sabab ketganini aytdi

Gulruhbegim Rossiyaning Sochi shahrida shaxmat bo'yicha erkaklar va ayollar o'rtasida o'tkazilgan FIDE Jahon Kubogida AQSH terma jamoasida debyut qilib, 1/32 final bosqichiga etib borgandi. 

Taqqoslash uchun, aynan shu musobaqada ishtirok etgan O'zbekiston ayollar terma jamoasining har ikkala vakilasi - Nilufar Yoqubboeva va Umida Omonova birinchi davradayoq mag'lubiyatga uchrab, Jahon Kubogidagi ishtiroklarini yakunlashgan edi.  

Tohirjonova O'zbekistondan ketishiga kim sababchi bo'lganligiga bizga bergan intervyusida malum qildi.  

"Menga oxirgi payt O'zbekiston shaxmat federaciyasida bo'layotgan ishlar haqida jurnalistlar savollar berishyapti. SHundan kelib chiqib shu va boshqa savollarga ham javob berishga qaror qildim. 

"Rostan ham ketishingizga Federaciya raisi o'rinbosari Husan Turdaliev sabab bo'lganmi?" deb so'rashdi.

Ha, haqiqatan ham ketishimga Turdaliev va uni qilgan ishlari sabab bo'lgan. Birinchisi, meni opalarim bilan O'zbekiston terma jamoasida O'zbekiston sharafini himoya qilishimizga ruxsat berilmagan. Va hech qachon uch opa-singilda hech qaysi turnirda O'zbekiston sharafini himoya qilishga imkon bo'lmagan. Moliyaviy tarafdan 15 yil ichida federaciya tarafidan qo'llab-quvvatlanmaganmiz. Bunga o'xshash vaziyatlar ko'p va bular haqida gapirib o'tirmayman.

"O'zbekistonga qaytib kelasizmi? Qachon qaytasiz?" degan savollar ham ko'p bo'lyapti...

... Qiziqayotganingiz uchun katta rahmat. Turizm va sport vaziri Aziz Abduhakimov federaciya rahbariyatiga kelganidan keyin juda ham katta o'zgarishlar bo'ldi. Ular juda ham yuqori darajadagi, yaxshigina mukofot jamg'armasiga ega turnirlarni tashkil qilishdi. O'zbekiston yoshlariga, mamlakat shaxmatiga bo'lgan qiziqish, munosabat o'zgardi. Juda katta qo'llab-quvvatlanish bo'lyapti. Bu o'zgarishlarni ko'rib juda ham quvondim. Men qaytishim mumkin, agar federaciyada o'zgarishlar bo'lsa. Albatta, o'z yurtim sharafini himoya qilishdan juda ham xursand bo'lardim. Lekin o'sha sharoitda men o'sishim uchun boshqa davlatga ketishim kerak degan qarorga kelgan edim.