Gulruhbegimda g'alaba, turnir jadvalida qo'shhokimlik

Ayollar o'rtasida o'tkazilayotgan musobaqaning beshinchi turida xalqaro grossmeysterimiz Gulruhbegim Tohirjonova muhim g'alabani qo'lga kiritdi. Turnir reytingida birinchi raqam ostida tasniflangan Tohirjonova qora donalarda harakat qilishiga qaramay, qozog'istonlik Gulisxan Naxbaevani mag'lubiyatga uchratdi. 

O'tgan turda aynan Tohirjonovani mag'lub etgan yana bir hamyurtimiz Nilufar Yoqubboeva esa bu turda oq donalarda qozog'istonlik Gulmira Dauletova bilan murosaga keldi. Beshinchi turdan so'ng turnir jadvalida Yoqubboeva va Tohirjonova 4tadan ochko bilan qo'shhokimlik qilishyapti. 

Qozog'istonlik shaxmatchilar - Amina Kairbekova, Gulmira Dauletova va Bibisara Assaubaeva 3,5 ochkodan jamg'arib, keyingi o'rinlarni band etishgan. Bugun 6-turda Gulruhbegim qora donalarda Assaubaevaga qarshi bahs olib boradi. Yoqubboeva esa Kairbekova bilan hisob-kitob qiladi.