Gulruhbegimning kutilmagan mag'lubiyati FOTOGALEREYA

Ayollar o'rtasida o'tkazilayotgan musobaqaning to'rtinchi turida xalqaro grossmeysterimiz Gulruhbegim Tohirjonova kutilmaganda mag'lubiyat alamini totib ko'rdi. Turnir reytingida birinchi raqam ostida tasniflangan Tohirjonova oq donalarda harakat qilishiga qaramay, yana bir hamyurtimiz Nilufar Yoqubboevaga imkoniyatni boy berib qo'ydi. 

Ushbu g'alabasi evaziga Yoqubboeva musobaqa jadvalida 3,5 ochko bilan yakka peshqadam bo'lib oldi. Qozog'istonlik shaxmatchilar - Madina Davletbaeva va Gulisxan Naxbaeva uchrashuvida durang qayd etildi. Grossmeysterimiz Sarvinoz Qurbonboeva qozog'istonlik Gulmira Dauletovaga yutqazib qo'ydi. 

Bahora Abdusattorova yana bir qozog'istonlik shaxmatchi Bibisara Assaubaevaga yutqazdi. Bugun o'tkaziladigan beshinchi tur oldidan Yoqubboeva 3,5 ochko bilan yakka karvonboshi bo'lib turibdi. Gulmira Dauletova va Gulruhbegim Tohirjonova hisobida 3 tadan ochko bor. Bugun Nilufar oq donalarda Dauletovaga qarshi o'ynaydi. Tohirjonova esa qora donalarda Naxbaeva bilan hisob-kitob qiladi. 

Suratlar muallifi - Alimurod Mamadaminov