Hulkar Tohirjonova Gulruhbegimning AQSHga ketishi, fuqarolik va federaciya munosabati haqidagi savollarga javob berdi

Saytimiz muxbiri ushbu masalaga aniqlik kiritish maqsadida shaxmatchimizning opasi Hulkar Tohirjonova bilan qisqa intervyu tashkil etdi.

"Gulruhbegim hozir AQSHdagi Missuri universiteti jamoasi sharafini himoya qilmoqda. Agar xalqaro musobaqalarda ishtirok etadigan bo'lsa, AQSH nomidan dona suradi. U ayni paytda klubi bilan birga klublar o'rtasidagi Evropa chempionatida o'ynamoqda. (Evropada ham klub sharafini himoya qiladi - Olamsport) 

Ayni paytda unga ko'plab murojaatlar bo'lmoqda. Turnirda ishtirok etayotgani sababli savollarga javob bera olmayapti.

- U Amerika Qo'shma SHtatlari fuqaroligini oldimi?

- Yo'q, fuqarolik olingani yo'q. Faqatgina federaciya o'zgardi. U O'zbekiston fuqarosi. 

- Ushbu taklifni qabul qilishiga nima sabab bo'ldi?

- Bunga sabablar ko'p. Bu haqida omma oldida shov-shuv qilmoqchi emasdik. Biz faqatgina O'zbekiston uchun o'ynaganmiz. Asosiy qarorni o'zi qabul qildi. Dadam, opam va men bunga qarshilik qilmadik. Gapirsa gap ko'p. SHu to'g'ri qaror deb hisobladik. 

- O'zbekiston shaxmat federaciyasi bunga munosabat bildirdimi?

- Yo'q, federaciya tomonidan bunga xech qanday rasmiy munosabat bo'lgani yo'q. Biz o'z ishimizni davom ettiryapmiz, "Sky Chess" klubi faoliyat olib bormoqda. Ancha yillardan buyon terma jamoada o'ynamayapmiz. Uchchalamizni ham terma jamoadan chiqarib yuborishgan. (Izoh - Nafisa Mo'minova, Hulkar Tohirjonova va Gulruhbegim Tohirjonova nazarda tutilmoqda - Olamsport).

Opam ham Evropa klubi tarkibida onlayn musobaqada ishtirok etmoqda.