Hulkar Tohirjonova: "Venkon Cup"ni xalqaro turnirga aylantirmoqchimiz"

Ertaga esa turnir doirasida grossmeysterlar o'zaro bellashadilar.

O'smirlar o'rtasidagi bahslar yakunlanganidan so'ng biz turnir tashkilotchilaridan biri hisoblangan Hulkar Tohirjonovaning fikrlari bilan qiziqdik.

"Ushbu turnirimiz ikkinchi marotaba o'tkazilmoqda. O'tgan yili bo'lib o'tgan ilk musobaqada asosan Toshkent shahridagi bolakaylar ishtirok etgandilar. Bu safar esa Respublikamizning boshqa viloyatlaridan ham shaxmatchilar tashrif buyurdilar.

"Venkon Cup" turnirini bemalol xalqaro musobaqa deb aytishim mumkin. CHunki, tezkor shaxmat bahslarida Franciya, Qozog'iston va Misrdan tashrif buyurgan grossmeysterlar ham bellashadilar. O'zbekistondan ham kuchli grossmeysterlar taklif etilgan. Ushbu turnir 17 dekabr kuni bo'lib o'tadi.

13-16 dekabr kunlari bo'lib o'tgan bahslar esa 16 yoshgacha bo'lgan bolalar ishtirok etdilar.

Turnir tashkiliy tomonlama o'tgan yilgiga qaraganda ancha o'sishga erishdi. Boshqa viloyatlardan ham sportchilarni taklif qila oldik. CHet ellik grossmeysterlarni ham taklif qildik.

Buning uchun, hamkorlarimizga alohida minnatdorchilik bildirib o'tishimiz kerak. CHunki, ularning yordamisiz buni amalga oshira olmasdik. Turnir bosh homiysi "Venkon Group" kompaniyasiga, shuningdek La’core, Fiori va Ideal kabi hamkorlarimizga o'z minnatdorchiligimni bildiraman.

Nasib qilsa, ushbu turnir keyingi yili to'liq xalqaro turnirga aylanadi.

17 dekabr kungi turnirda qozog'istonlik Murtas Kajgaliev, misrlik Sami SHoker, Gulruhbegim Tohirjonova, Saidali Yuldashev, Vladimir Egin kabi kuchli shaxmatchilarimiz qatnashadilar.

Undan tashqari, O'zbekiston tadbirkorlari uchun 10ta joy ajratganmiz. Qolaversa, "Sky Chess" maktabining kuchli shaxmatchilari, shuningdek, o'smirlar turnirining kuchli o'nligiga kirgan sportchilar, undan tashqari ro'yxatdan o'tishga ulgurgan 40 nafar shaxmatchi ham ishtirok etishi mumkin. Ular "Poytaxt" biznes markazining sakkizinchi qavatida joylashgan "Sky Chess" maktabida ro'yxatga o'tishlari mumkin", - dedi Hulkar Tohirjonova.

Aziz To'xtamurodov