"Humo" 2024 yilni mehmondagi g'alaba bilan yakunladi

Xabar berganimizdek, Toshkentning "Humo" xokkey klubi bu safar Atirau shahrining "Beybaris" klubi mehmoni bo'ldi. Jamoalar o'rtasidagi ilk uchrashuvda (27.12.24) "Beybaris" 1:0 hisobida g'alaba qozongan edi.

Kecha ikkinchi uchrashuv o'tkazildi. O'yinning asosiy vaqti hamda overtaym 1:1 hisobidagi durang bilan yakunlandi. Bullitlar seriyasida esa omad "qanotlilar"ga kulib boqdi va "Humo" 2:1 hisobida g'alabaga erishdi. "Beybaris"ning yagona goliga Albert Gatin mualliflik qilgan bo'lsa, toshkentliklar safida Vadim Kravchenko hamda Artyom Lixotnikov shayba kiritdi.

Mazkur g'alabadan keyin "Humo"ning ochkolari soni 41 taga etdi. Klub turnir jadvalida shaybalar nisbati bo'yicha uchinchi o'rinda bormoqda. Jamoaning keyingi o'yinlari 9-10 yanvar kunlari Toshkentda "Gornyak"ka qarshi bo'lib o'tadi.