"Humo" - "Arlan" uchrashuvi taqdirini bullitlar seriyasi hal qildi

Bir kun avval o'tkazilgan ilk uchrashuvda "Humo" 4:3 hisobida g'alaba qozongandi. Kechagi o'yinda "qanotlilar" 0:2 hisobida ortda bora turib, kambekka erishishdi. Ammo o'yin yakunlanishiga bir daqiqadan sal ko'proq vaqt qolgan bir paytda "bo'rilar" hisobni tenglashtirishdi - 3:3! 

Besh daqiqadan iborat overtaymda hisob o'zgarmadi. Bullitlar seriyasida esa omad mehmonlarga kulib boqdi. "Arlan"ni mag'lubiyatdan qutqarib qoluvli shayba muallifi Stepan Sannikov bullitlar seriyasida ham o'zini ko'rsatib, uchrashuv qahramoniga aylandi. 

Bu ikki jamoa turnir jadvalida yonma-yon joylashgan. "Humo" 54 ochko bilan turnir jadvalida ikkinchi o'rinni egallab turgan bo'lsa, uchinchi pog'onadagi "Arlan" hisobidagi ochkolari 51 taga etdi. "Torpedo" klubi 56 ochko bilan peshqadamlik qilmoqda. 

"Humo" klubi navbatdagi ikki uchrashuvni ham o'z muxlislari ko'z o'ngida o'tkazadi. 31 yanvar va 1 fevral kunlari "Humo Arena"da 8-o'rinda borayotgan "Nomad" klubi mehmon bo'ladi. Aynan mana shu ikki o'yin bilan Qozog'iston chempionati yakunlanib, pley-off bosqich bahslariga start beriladi.