"Humo" bosh murabbiyi kechagi g'alabadan keyin nimalar dedi?

Xokkeychilarimiz Pro Hokei Ligasy'dagi oltinchi uchrashuvni Atirauda turnir jadvali etakchilaridan biri "Beybaris"ga qarshi o'tkazib, 5:2 hisobida zafar quchishdi. Ushbu g'alabadan so'ng "Humo" 6 ochko bilan 6-o'ringa ko'tarilib oldi. "Beybaris" esa mag'lubiyatdan so'ng uchinchi pog'onaga tushib qoldi.

O'yindan so'ng o'tkazilgan matbuot anjumanida "Humo" bosh murabbiyi Evgeniy Popixin savollarga javob qaytardi. 

- Ikkita yaxshi o'yin guvohi bo'ldik. Ajoyib raqib. Qozog'istonning eng kuchli jamoalaridan biri. Birinchi uchrashuvda o'yin teng bo'ldi. O'zimizning qo'pol xatolar evaziga alamli mag'lubiyatni sotib oldik. O'yinda intizomni ko'rmadim. Jami 20 daqiqalik jarima natijada aks etdi. Bugun esa yigitlar xatolardan to'g'ri xulosa chiqarib, muhim o'yinda g'alaba qozonishdi. Ishlashda davom etamiz. 

- “Humo”ning keyingi o'yinlaridan qanday natija kutsak bo'ladi?

- Liga o'yinlarini tahlil qila turib, shunga amin bo'ldimki, istalgan jamoa bir-birini mag'lub etib qo'yishi mumkin. Bu amalda ham bo'lyapti. CHempionatda o'tkinchi o'yinlar yo'q. Jamoaviy o'yin va intizomni joyiga qo'ya olsangiz, g'alaba sizniki bo'ladi. Har bir uchrashuv - bu chaqiriq. Har bitta o'yinda boshidan to serena chalingunicha oxirigacha kurashish kerak. Yutish uchun raqibga qaraganda ko'proq xohish, to'g'ri o'ynash va harakat bo'lishi lozim.